Қызылордалық кәсіпкер «Қайсардың» иесі атанды. Ол туралы не белгілі?
Қазақстандық кәсіпкер Исламғали Қозбақов «Қайсар» клубының иесі болды, деп хабарлайды «Серый CARDINAL».
«ФК «Қайсар» жекеменшік инвесторға берілді. Ертең бұл туралы Мемлекет басшысына баяндалады.
30 қазан күні Мемлекет басшысының Қызылорда облысына сапары күтілуде. Оның қарсаңында әкімдікте «Қайсарды» жекеменшікке өткізу мәселесі бойынша кеңес өтті. Барлық қажетті құжаттар рәсімделіп, енді клубтың жаңа иесі Исламғали Қозбақов болды. Ертең Қазақстан Республикасы Президентінің тапсырмасын табысты әрі жедел орындағаны жөнінде жергілікті билік есеп береді», — деп жазады телеграм-арна.
Ағымдағы маусымның қорытындысы бойынша қызылордалық клуб 22 ұпай жинап, ҚПЛ турнир кестесінде 11-орын алды.
Қозбақов — құрылыс саласындағы TAU Group Ltd компаниясын басқаратын қызылордалық кәсіпкер. Оның капиталы туралы ашық дереккөздерде ақпарат жоқ.
