Гасперини тоғыз жылдан кейін «Аталантаны» тастап кету туралы шешім қабылдады
Италиялық «Аталантаның» бас бапкері Джан Пьеро Гасперини клубпен қош айтысу туралы шешімін ресми түрде мәлімдеді, деп жазады журналист Маттео Моретто.
67 жастағы маманның келісімі 2026 жылдың жазына дейін жарамды болғанына қарамастан, ол клуб басшылығын өз шешімі жайлы хабардар етті. Ақпанда Гасперини келісімді ұзартпайтынын айтқан еді, бірақ сол кезде маусым соңына дейін клубта қалатын-қалмайтынын нақтыламаған.
Кей деректерге сүйенсек, «Аталанта» бапкерді ұстап қалуға мүдделі болған, алайда «Рома» оған 2028 жылға дейін есептелген келісімшарт пен жылына 5 миллион еуро жалақы ұсынған.
Гасперини 2016 жылдан бері бергамолық команданы басқарып келеді. Осы аралықта ол «Аталантамен» тарихи жетістіктерге жетіп, 2024 жылы команда Еуропа лигасын жеңіп алды. Ал биылғы маусымда клуб Серия А-да үшінші орын алды және біраз уақыт чемпиондыққа таласты.
Арне Слот LMA нұсқасы бойынша жылдың үздік бапкері атанды.
