Флориан Вирц «Ливерпульге» ауысады: €135 миллионнан асатын трансфер келісілді
«Ливерпуль» клубы мен Германияның «Байер» командасы жартылай қорғаушы Флориан Вирцтің трансфері бойынша келісімге келді.
Журналист Бен Джейкобстың әлеуметтік желі Х-та (бұрынғы Twitter) хабарлауынша, клубтар келісімнің негізгі шарттарын мақұлдады. Жалпы мәміле сомасы €117 миллион және қосымша бонус ретінде тағы €18,7 миллионды құрайды.
Ақпарат көзінің мәліметіне сәйкес, «Ливерпуль» £100 миллион көлеміндегі негізгі соманы төлеуге дайын. Қалған £16 миллион клубтың жетістіктеріне байланысты төленеді — атап айтқанда, егер Вирц команда құрамында болып, ол ірі трофейлерге қол жеткізсе.
2024/2025 жылғы маусымда Бундеслигада 22 жастағы футболшы 31 матч өткізіп, 10 гол соғып, 12 нәтижелі пас берген. Чемпиондар лигасында ол 9 ойынға қатысып, 6 гол мен 1 ассист жасады.
Флориан Вирц - Еуропадағы ең жарқын жас таланттардың бірі саналады. Оның Англия Премьер-лигасына ауысуы жазғы трансферлік кезеңнің басты оқиғаларының біріне айналуы мүмкін.
