«Бұл - арандату»: «Атырау» клубының менеджері «Ұлытаудан» жеңілгеннен кейінгі даулы жағдайға түсініктеме берді
«Атырау» футбол клубының бас менеджері Дидар Сыдықбек ҚПЛ-дің 12-турында «Ұлытау» командасынан 0:1 есебімен жеңілгеннен кейін пайда болған даулы жағдайға қатысты пікір білдірді.
Желіде тараған, ойыншылардың бірі жазды делінген мәлімдемеге қатысты ол түсініктеме берді.
Өзінің Telegram-арнасында жариялаған хабарламасында Сыдықбек бұл жағдайды қолдан жасалған арандату деп атады:
– «Бұл мәселені қозғай бермейік. Бұл – қарапайым арандату. Біздің командадан ешкім ондай нәрсе жазған жоқ. Өкінішке қарай, қазір мұндай нәрселер тез тарап кетеді. Кейбіреулер мұндай жағдайдан ләззат алады. Сондықтан, жағдай қалай өрбімесін, «Атырау» футбол клубын қолдайық. Мен ойыншыларға емес, клубтың өзіне қолдау білдірейік дегім келеді», – деді ол.
Қазіргі уақытта «Атырау» төрт ұпаймен турнир кестесінде 14-орында тұр. Команда келесі кездесуін 21 маусым күні елордада «Жеңіс» клубына қарсы өткізеді.
