«Бернли» жаттықтырушысы Сатпаевтың мықты тұстарын атады
«Бернлидің» бас бапкері Ники Хайен Англия Чемпионшипінің екінші турындағы «Вест Бромвичке» қарсы ойын алдындағы баспасөз мәслихатында Қазақстан құрамасының шабуылшысы Дастан Сатпаев туралы пікір білдірді, деп хабарлайды Sports24.kz.
«Әрине, Дастан өте дарынды футболшы. Жасы бар болғаны 18-де, бірақ оның техникалық шеберлігін және қарсылас қақпасына қауіп төндіре алатын мүмкіндігін көрсеңіз, оның командамыз үшін қаншалықты құнды екенін бірден байқайсыз. Чемпионатта біз 46 матч өткіземіз, оған қоса кубоктық кездесулер бар. Біз мүмкіндігінше көп ойыншыны іске қосуды әрі жоғары деңгейде өнер көрсетуді қалаймыз.
Әр футболшы өз мүмкіндігінің шегіне дейін ойнауы тиіс, бірақ 46 кездесудің бәрін толық күшпен өткізу іс жүзінде мүмкін емес. Сондықтан бізге айырмашылық жасай алатын ойыншылар керек, ал Дастан — сондайлардың бірі. Ол негізгі құрамда алаңға шыға ма? Біздің ұжым үшін әр ойыншы маңызды», — деді Хайен.
«Бернли» мен «Вест Бром» арасындағы матч алдағы жексенбі, 23 тамыз күні өтеді. Ойынның басталу ысқырығы 16:00-де естіледі.
Еске сала кетейік, «Бернли» өткен маусым қорытындысы бойынша Англия Премьер-лигасынан шығып қалып, 2026/27 маусымын Чемпионшипте өткізеді. Бұған дейін біз қала мен клуб туралы кеңейтілген материал дайындаған едік, дәл осы жерде Қазақстан құрамасының шабуылшысы жалға алу құқығымен өнер көрсететін болады.
