Беделді портал Сатпаевты Чемпиондар лигасының ең үмітті дебютанттары тізіміне қосты
«Қайрат» шабуылшысы Дастан Сатпаев беделді Goal порталының нұсқасы бойынша Чемпиондар лигасының ең үмітті дебютанттары қатарына енді.
Сайтта атап өтілгендей, Сатпаев бар болғаны 17 жасында-ақ «Қайраттың» негізгі ойыншыларының бірі атанып үлгерді – ол ұлттық чемпионатта да, халықаралық аренада да өзін көрсетті. Әсіресе, Дастан Чемпиондар лигасының іріктеу кезеңінде үш гол соғып, командасының турнирдің негізгі кезеңіне шығуына зор үлес қосты.
Сатпаев бұл тізімде осындай жас таланттармен қатар тұр: Эстевао («Челси»), Лукас Бергвалль («Тоттенхэм»), Рио Нгумоа («Ливерпуль»), Франко Мастантуоно («Реал» Мадрид), Макс Доуман («Арсенал») және басқалар. Олардың кейбірі Чемпиондар лигасында дебют жасап үлгерген.
Дастан Чемпиондар лигасының негізгі кезеңіндегі алғашқы ойынын «Спортингке» қарсы өткізеді деп күтілуде. Бұл матч 19 қыркүйекке қараған түні өтеді. Алдағы кездесудің фавориті де белгілі болды.
