«Атлетико» Рашфордты «Барселонадан» өзіне тартуға тырысып жатыр
Қысқы трансферлік терезе ресми ашылмай жатып-ақ, Испания Примерасында қызу трансферлік тартыс басталды.
El Nacional-дың хабарлауынша, «Манчестер Юнайтедтің» 28 жастағы шабуылшысы Маркус Рашфорд қазір «Барселонада» жалға ойнап жүрсе де, оның «Атлетикоға» ауысу мүмкіндігі бар.
Ақпарат көздеріне сенсек, «Барселона» ойыншыны сақтап қалғысы келгенімен, «Кольчонерос» Маркусты Мадридке алып келу үшін үлкен құрбандықтарға баруға дайын.
Бұған дейін Рашфорд «Манчестер Юнайтед» басшылығына Ла Лиганың өзге клубтарынан түскен ұсыныстарды қарастырмауды сұраған болатын, өйткені ол тек «Барселонада» ойнауды қалайды. Алайда, «Атлетико» каталондық клуб ұсына алмайтын әлдеқайда пайдалы жеке келісімшарт ұсынатынына сенімді.
Биылғы маусымда шабуылшы «Барселона» сапында 23 ойын өткізіп, 7 гол соғып, 11 нәтижелі пас берген.
Айтпақшы, Шерхан Калмурза «Реалға» қарсы матчтан кейін «Барселонаға ауысуы» туралы мәлімдемесімен таңғалдырды.
