Атырау құрамын жас жартылай қорғаушымен нығайтты

Футбол 21 ақп 2025 02:58

Аружан Темірбек

Редактор

“Атырау” орталық жартылай қорғаушы Роман Чирковпен келісімшартқа отырғанын жариялады. 21 жастағы футболшымен жасалған келісім 2025 жылдың соңына дейін есептелген.

Чирков – алматылық “Қайрат” клубының түлегі. Соңғы екі маусымда ол Бірінші лигада “Ақжайық” сапында өнер көрсетіп, 52 матчқа қатысып, 9 гол соқты және 1 нәтижелі пас берді. 2019 жылы жартылай қорғаушы Қазақстанның 17 жасқа дейінгі жасөспірімдер құрамасына шақырылып, екі ойын өткізді.

“Атырау” 2024 жылғы Премьер-лига маусымын жетінші орынмен аяқтады. Жаңа чемпионатты команда 1 наурыз күні “Елимайға” қарсы өз алаңында бастайды.

Бұған дейін “Атырау” қорғаушы Микаэль Аскаровпен келісімшартқа отырғанын хабарлаған еді.