«Ақтөбе» клубтың бұрынғы басшысына сотпен қорқытты
«Ақтөбе» футбол клубы бірқатар футболшылар мен жаттықтырушылардың өкілдеріне берешегі бар екені туралы ақпарат тарағаннан кейін ресми мәлімдеме жасады. «Қызыл-ақтар» басшылығы клубтың бұрынғы басқарма төрағасы Арман Оспанов қол қойған келісімдерге заңгерлік тексеру жүргізуді бастады, деп хабарлайды Sports24.kz.
Ақпарат кеңістігінде «Ақтөбенің» футболшылар мен жаттықтырушылардың агенттері мен өкілдеріне берешегі болуы мүмкін екені туралы хабарламалар пайда болды. Осы жарияланымдарға жауап ретінде клуб басшылығы қазіргі жағдайды түсіндірген ресми мәлімдеме таратты. Клубта команда жұмысы штаттық режимде жалғасып жатқаны, ал даулы келісімдер заңгерлік сараптамадан өтіп жатқаны атап өтілді.
«Клуб өз қызметін штаттық режимде жалғастырып жатыр. Қазіргі уақытта жарияланымдарда аталған, бұған дейін клубтың бұрынғы басқарма төрағасы А. Оспанов жасасқан агенттік келісімдер заңнама талаптарына және ФИФА-ның реттеуші құжаттарына сәйкестігі тұрғысынан заңгерлік тексеруден өтіп жатыр», - делінген «Ақтөбе» мәлімдемесінде.
«Ақтөбе» басшылығы жағдайдың одан әрі өрбуінің екі ықтимал сценарийін атады. Егер тексеру бұрын жасалған келісімдердің заңдылығын растаса, клуб барлық қарастырылған қаржылық міндеттемелерді орындауға міндеттенеді. Алайда заңбұзушылықтар анықталған жағдайда, «қызыл-ақтар» тиісті қаражатты сот арқылы қайтаруға ниетті.
«Тексеру қорытындысы бойынша аталған келісімдердің заңдылығы расталған жағдайда, барлық қарастырылған төлем толық көлемде жасалады. Заңбұзушылықтар анықталған жағдайда клуб тиісті қаражатты А. Оспановтан сот тәртібімен өндіріп алуға ниетті», - деп хабарлады клуб.
Еске салайық, Арман Оспанов 2026 жылғы 8 қаңтарда «Ақтөбе» клубының басқарма төрағасы қызметіне кіріскен болатын. Алайда 22 сәуірде-ақ ол қызметінен кетті. Басшылықтағы кезеңі қысқа болғанына қарамастан, Оспановтың тұсында клуб айтарлықтай трансферлік науқан өткізіп, құрамын бірнеше шетелдік футболшымен толықтырды. Ең танымал жаңа ойыншылардың бірі Португалия құрамасының бұрынғы футболшысы Луиш Нани болды.
