Андрей Шевченкоға — 50: оның Қазақстанмен матчтардағы голдарын еске аламыз
29 қыркүйекте әлемдік футбол тарихындағы ең танымал шабуылшылардың бірі, 2003 жылғы Чемпиондар лигасының жеңімпазы әрі 2004 жылғы «Алтын доп» иегері Андрей Шевченко 50 жасқа толады. Sports24.kz экс-форвардтың Қазақстан құрамасымен жолы қалай түйіскенін еске ұсынады.
Әлем чемпионатына жолдама әперген гол
Украина құрамасы Қазақстан еуропалық футболға ауысқаннан кейін кездескен алғашқы жұлдызды командалардың бірі болды. Бұл 2006 жылғы әлем чемпионатына іріктеу кезеңінде-ақ орын алды.
2004 жылғы 8 қыркүйекте Алматыда өткен матчқа Шевченко келген жоқ — сол кездегі Чемпиондар лигасының жеңімпазы әрі «Алтын доп» иегері Қазақстанмен алғаш рет 2005 жылғы 4 маусымда Киевте ойнады. Капитан ретінде ол Юрий Новиков қорғаған қақпаны 18-минутта-ақ дәл көздеді.
Төрт күннен кейін, 2005 жылғы 8 маусымда Украина Шевченко гол соқпаса да, оның алаңға шығуымен Грекияны жеңіп, өз тарихындағы алғашқы әрі әзірге жалғыз әлем чемпионатына жолдамасын рәсімдеді. Ал Қазақстан УЕФА аймағындағы алғашқы іріктеу кезеңін бар болғаны бір ұпаймен және турнир кестесінің соңында аяқтады.
Тағы да әлем чемпионатына іріктеу, тағы да гол, бірақ бұл жолы Қазақстанда
Украина мен Қазақстанның тағдыры әлем чемпионатына іріктеу кезеңінде тағы тоғысты. Бұл төрт жылдан кейін, 2010 жылғы әлем чемпионатына іріктеу барысында болды. Бұл жолы Шевченко өз алаңындағы матчта ойнай алмады, есесіне Алматыға келді.
- Сондай-ақ оқыңыз: «Қайраттың» Чемпиондар лигасындағы қарсыластары халықаралық үзіліс алдындағы чемпионат матчтарын қалай өткізді?
2008 жылғы 10 қыркүйекте өткен матчтың басты қаһарманы Евгений Селезнев болды: оның екі нәтижелі пасынан кейін украиналықтар жеңіске жетті. Сол пастардың бірі үш апта бұрын ғана «Миланға» жалға келген Шевченкоға бағытталды.
Сол кезде Қазақстан УЕФА аймағындағы әлем чемпионатына іріктеу кезеңінде алғашқы жеңістеріне қол жеткізіп, Андорраны екі рет ұтты. Алайда бұл жеңістер жалғыз болып қалды: қалған сегіз матчтың барлығында Қазақстан Англиядан, Украинадан, Хорватиядан және Беларусьтен жеңілді.
Киевте жаттықтырушы Шевченкодан ұпай тартып алған Қазақстан
Дегенмен Қазақстан Шевченконы жаттықтырушы ретінде қапаландыра алды. Оның үстіне, өз құрамасы Украинамен тең түсті. Ал Украина арада төрт айға жуық уақыт өткен соң Еуропа чемпионатының ширек финалына шықты!
Бұл сол әлем чемпионатына іріктеудің үшінші турында болды, бірақ бұл жолы 2022 жылғы турнирге жолдама сарапқа салынды. 20-минутта Роман Яремчук соққан голға Талғат Байсуфинов шәкірттері Серікжан Мужиковтың добымен жауап беріп, Киевтен абыройлы тең нәтижемен оралды.
2021 жылғы 1 қыркүйекте сол кездегі Нұр-Сұлтанда өткен, 2:2 есебімен аяқталған қарымта кездесуге Украина құрамасын жаттықтырушы ретінде Александр Петраков алып келді. Іріктеу қорытындысы бойынша Украина топта екінші орын алып, плей-офф кезеңіне жолдама алды. Ал Қазақстан Украинамен екі рет тең түсіп, Босниямен де бір кездесуде тең ойнап, үш ұпаймен топты соңғы орында аяқтады.
Қазақстандағы матчтан көп ұзамай, 2021 жылғы қарашада Шевченко «Дженоа» клубын басқарды. Алайда ол командадан 2022 жылғы қаңтарда-ақ кетті. Осылайша Шевченконың жаттықтырушылық мансабы аяқталды: арада екі жыл өткен соң аты аңызға айналған шабуылшы Украина футбол қауымдастығын басқарды және осы күнге дейін оның президенті қызметін атқарып келеді.
