Алтын допқа үміткер: Рафинья мансабындағы ең үздік маусымын өткізіп, Барселонаны шыңға жетелеуде
Өткен жазда Рафинья “Барселонадан” кетуі мүмкін негізгі ойыншылардың бірі болған еді. Соңғы уақытта каталондықтар жақсы ұсыныс түссе, кез келген футболшымен қош айтысуға дайын болған, ал бразилиялық та сол тізімде тұрды. 2022 жылдың жазында “Лидстен” ауысқаннан кейін оның “Барселонадағы” мансабы оңай басталмады. Каталондықтар Премьер-лиганың аутсайдері сапында ойнаған футболшы үшін 58 миллион еуро төледі. Осындай қомақты сомаға алынған ойыншыдан бірден нәтиже күтілетіні сөзсіз.
Дәл солай болды. “Барселона” жейдесін киген алғашқы сәттен-ақ Рафинья қысымға тап болды. Ла Лиганың үшінші турында ол алғаш рет нәтижелі пас берді, ал төртінші матчында алғашқы голын соқты. Бір қарағанда, жаңа ойыншы үшін жаман көрсеткіш емес. Бірақ бұл оның Ла Лиганың алғашқы 10 кездесуіндегі жалғыз голы мен ассисті еді. Мұндай нәтижелер “Барселона” деңгейіндегі клубқа келген футболшы үшін тым төмен. Каталондық жанкүйерлер кез келген ойыншыдан, әсіресе қымбатқа түскен жұлдыздардан, бірден жоғары деңгейде өнер көрсетуді күтеді.
Рафиньяның “Барселонадағы” алғашқы екі маусымы оңай өткен жоқ. Ол ара-тұра гол соғып, нәтижелі пас беріп тұрды, бірақ одан әрдайым одан да көп нәрсе талап етілді. Оған қоса, оның позициясында Ламин Ямальдың жылдам өрлеуі орын алып, бразилиялықтың алаңға шығу мүмкіндігі азая түсті. Жанкүйерлер жас талантқа бірден бауыр басып, Рафиньяны екінші рөлге ығыстырып тастады. Клуб басшылығы да солай ойлағандай, өйткені оны сату туралы жаңалықтар күн сайын дерлік шығып жатты.
Осылайша, Рафинья қиын жағдайда қалды. Хави, клуб басшылығы мен жанкүйерлер оған онсыз да аса сенім артпайтын, ал енді қарсы алдында жас әрі жарқын қарсылас пайда болды. Барлығы тек қиындай түсті. Жақында берген сұқбаттарының бірінде бразилиялық “Барселонадан” екі рет кеткісі келгенін мойындады. Оның жағдайын ескере отырып, бұл таңғаларлық емес еді. Бірақ Рафинья берілмеді. Ол әрқашан жоғары деңгейде ойнауды армандаған және осы мақсат жолында талмай еңбектенді. Ол “Лидсте” Марсело Бьелсаның қол астында өзін жақсы көрсеткен еді және “Барселонадан” да дәл солай оңай кете салуға дайын болмады. Бірақ жағдайды өзгерту қажет екені анық болды.
Бақытына орай, “Барселона” басшылығы мен Хавидің арасы суып, бұл Рафиньяның мүмкіндігін арттырды. Ал каталондықтардың Ханс-Дитер Фликті бас бапкерлікке тағайындауы тіптен оның пайдасына шешілді. Неміс маманына басында сенімсіздікпен қарады. Иә, ол “Бавариямен” требл жеңіп алды, бірақ Германия құрамасында сәтсіздікке ұшырады. Оның үстіне, ол “Барселонаның” бірінші таңдауы да болмаған еді – клуб өзге кандидаттарды қарастырған, алайда ешқайсысын алып келе алмады. Дегенмен, Флик жылдам түрде өзіне деген көзқарасты өзгертті. Алдымен ойыншылар мен басшылықты, сосын жанкүйерлерді сендірді. Ол әлі де испан тілінде еркін сөйлемейді, бірақ клубта бірнеше жылдан бері жүргендей әсер қалдырады.
Неміс бапкерлері әрдайым тәртіпке, физикалық дайындыққа және прессингке ерекше мән береді. Флик еңбекқор, алаңда бар күшін салатын футболшыларды бағалайды, ал Рафинья дәл сондай ойыншылардың қатарынан табылды. Бразилиялық үшін “Барселонада” жаңа парақ ашылғандай болды, және ол бұл мүмкіндікті құр жібермеді. Флик әр ойыншыны мұқият зерттеп, олардың ең мықты тұстарын анықтады. Рафиньяның да ойынына өзгерістер енгізілді. Бразилиялықтың әлеуетін толық ашу үшін оған аздап сенім артып, шабуылдың сол қапталына ауыстыру жеткілікті болған екен. Жаңа бапкердің қол астында Рафинья өзінің нағыз деңгейін көрсете бастады.
Флик келген сәттен бастап, Рафинья бірден нәтижелі ойын өрнегін көрсете бастады. Қазір оның еншісінде барлық турнирлерде 27 гол мен 19 нәтижелі пас бар. Ол Еуропаның ТОП-5 лигасының барлық ойыншылары арасында гол+пас жүйесінде екінші орынға шықты. Одан жоғары тек Мохамед Салах тұр, бірақ мысырлық ойыншы алаңда 300 минутқа артық өткізген. Ла Лиганың биылғы маусымында Рафинья 13 гол соқты – бұл оның мансабындағы екінші үздік көрсеткіш. Ол бұдан көп тек 7 жыл бұрын Португалия чемпионатында, “Витория Гимараэш” сапында ойнағанда ғана гол соққан. Рафинья Ла Лиганың үздік сұрмергендерінің бестігіне еніп, “Барселона” сапында Роберт Левандовскиден кейінгі екінші орында тұр.
Флик басқарғаннан бері бразилиялық өзінің барлық үздік қырларын толықтай аша алды. Бұған дейін де ол шығармашылық қабілеті бар ойыншы екенін дәлелдеген, бірақ осы маусымда бұл тұрғыда жаңа деңгейге көтерілді. Рафинья 116 қауіпті сәт ұйымдастырды – бұл Еуропаның ТОП-5 лигасындағы ең үздік нәтиже. Сонымен қатар, ол құрылған голдық мүмкіндіктер (38) және ойын барысында жасалған қауіпті сәттер (91) бойынша Еуропада көш бастап тұр.
Рафиньяның өрлеуі “Барселонаның” Ла Лиганың көшбасшысы атануына тікелей әсер етті. Дегенмен, каталондықтардың бүкіл командасы, әсіресе шабуыл шебі, керемет деңгейде өнер көрсетіп жатыр. “Барселона” осы маусымда 42 матчта 128 гол соғып, бір ойынға орташа есеппен 3,05 голдан енгізуде – бұл ТОП-5 лигасындағы ең жоғары көрсеткіш. Бразилиялық “Барселонаға” Испанияда чемпиондық үшін күресуге және Чемпиондар Лигасында жарқырауға көмектесуде. Ол ЛЧ-ның биылғы маусымында 11 гол мен 5 нәтижелі пас жасады. Осылайша, ол Раульдің рекордын қайталап, бір маусымда гол+пас жүйесі бойынша 16 ұпай жинады. Егер Рафинья тағы 4 нәтижелі әрекет жасаса, ол Криштиану Роналдуның 2013/14 жылғы рекордын жаңартады.
Маусым барысында Рафинья “Алтын доптың” үміткерлер тізімінде жоғарылай түсті. Бұған “Ливерпульдің” Чемпиондар Лигасынан ұшып кетуі да ықпал етті, нәтижесінде Салах фаворит мәртебесінен айырылды, ал оның орнын Рафинья басты. Бұл қисынды да: бразилиялық – өз командасының ең маңызды ойыншыларының бірі, ал “Барселона” треблге үміткер. Маусым соңғы нүктесін қойғанша, оның мүмкіндіктері әлі де жоғары. Ойын мәнері мен көрсеткіштері ескерсек, Рафинья жаңа рекордтар орнатуды жалғастыра беруі әбден мүмкін.
