Жүлдеге бір қадам: Ертуған Зейнуллинов Әлем кубогының жартылай финалына шықты
Қазақстандық былғары қолғап шебері Ертуған Зейнуллинов Астанада өтіп жатқан World Boxing Әлем кубогында ширек финалдық жекпе-жегін сәтті өткізді.
65 келіге дейінгі салмақ дәрежесінде Зейнуллинов Франция өкілі Юго Громен қолғап түйістірді. Жекпе-жек толықтай Ертуғанның басымдығымен өтіп, төрешілер бірауыздан жеңісті қазақстандық боксшыға берді.
Осылайша, Ертуған Зейнуллинов турнирдің жартылай финалына жолдама алып, кем дегенде қола медальді иеленуді қамтамасыз етті. Ал оның қарсыласы Юго Гро жарысты жүлдесіз аяқтады.
Айта кетейік, Зейнуллинов – жастар арасындағы Азия чемпионатының қола жүлдегері, студенттер арасындағы әлем чемпионы және Қазақстан чемпионатының жеңімпазы.
Сонымен қатар, Қазақстан құрамасының тағы үш спортшысы – Алуа Балқыбекова, Аида Әбікеева және Елдана Тәліпова да өз жекпе-жектерінде жеңіске жетті.