Жан КОСОБУЦКИЙ: “Фьюри Усикке қарсы жекпе-жекте әлдеқайда қаталдау болуы керек еді”
Жан Кособуцкий – ауыр салмақта өнер көрсететін 36 жастағы қазақстандық кәсіпқой боксшы. Ол кәсіпқой рингте 20 жекпе-жек өткізіп, 19-ында жеңіске жетті. Жан британиялық әйгілі боксшы Тайсон Фьюридің 2024 жылдың желтоқсанында Александр Усикке қарсы өткен реваншына дайындалуына көмектесті. Осы және өзге де тақырыптар төңірегінде ол Sport24.kz порталына берген сұқбатында баяндады.
– Жан, жағдайыңыз қалай? Көңіл-күйіңіз қалай?
– Барлығы жақсы, өзімді тамаша сезінемін.
– Қазіргі таңда жаттығу үдерісі қалай өтуде?
– Барлығы қалыпты режимде жалғасуда. Ешқандай кедергі жоқ, толыққанды дайындық үстіндемін. Жаттығу процесін шын жүректен ұнатып, ләззат алып жүрмін.
– Келесі жекпе-жегіңізге қатысты қандай да бір нақты ақпарат бар ма? Қашан, қай жерде өтеді? Қарсыласыңыз кім болуы мүмкін?
– Әзірге нақты ұсыныстар жоқ, мен үшін қызықты әрі мән-мағынасы бар айқастарға қатысты келіссөздер жүргізіліп жатқан жоқ.
– Қай боксшымен жұдырықтасқыңыз келеді?
– Әзірге нақты шешім қабылдаған жоқпын. Өзім де түрлі нұсқаларды ой елегінен өткізіп, саралап жүрмін (күліп).
– Тайсон Фьюридің Усикке қарсы реваншына дайындалуына көмектестіңіз. Дайындық қалай өтті? Онымен спарринг жасау қиын болды ма?
– Дайындық лагері мен үшін өте қызықты әрі тағылымды тәжірибе болды. Жекпе-жек алдындағы дайындық үдерісін ішінен сезініп, түрлі деңгейдегі жаттығуларға қатысуға мүмкіндік алдым. Спаррингтер өте қарқынды өтті, бұл мен үшін үлкен сабақ болды. Оларды аса ауыр деп айта алмаймын, бірақ босаңсуға да еш мүмкіндік болмады.
– Көпшілік Фьюриді даулы мінезді боксшы деп санайды, өйткені ол трэшток жасағанды ұнатады. Ал сіз оны адам ретінде қалай бағалайсыз?
– Трэшток - бұл спорт әлеміндегі шоу-бизнестің ажырамас бөлігі, сондықтан оны жеке қасиеттерімен байланыстыруға болмайды. Ал шынайы өмірде Тайсон өте жарқын, көңілді, әзілқой адам. Ол үнемі әзіл айтып, айналасына позитивті энергия сыйлап жүреді. Жалпы, жаттығу лагерінде тамаша атмосфера орнап, командада өзара түсіністік болды. Бұл дайындық кезеңі мен үшін ерекше әсерлі өтті.
– Фьюриге Усикке қарсы жекпе-жекте не жетіспеді? Ол бұл кездесуге толық дайын болды ма?
– Менің ойымша, бұл айқаста тактика мен стратегияны басқаша құру қажет еді. Тайсон жекпе-жекте әлдеқайда қаталдау болып, қарсыласына көбірек қысым көрсетуі тиіс болатын.
– Фьюри Усиктен екінші мәрте жеңілгеннен кейін мансабын аяқтауға шешім қабылдады. Бұл дұрыс шешім бе?
– Бұл - оның жеке таңдауы, сол себепті бұл шешім дұрыс деп санаймын. Алайда, өз басым оның рингке қайта оралуы әбден мүмкін деп ойлаймын.
– Қазіргі ауыр салмақтағы жағдайды қалай бағалайсыз? Усиктің жетістігінің құпиясы неде?
– Қазіргі ауыр салмақтағы жағдай өте қызықты. Соңғы жылдары көптеген тартысты жекпе-жектер өтті, әрі жақын уақытта бұдан да тартысты кездесулер өтеді деп ойлаймын.
– Сіздің мансабыңыздағы ең қиын жекпе-жек қайсысы болды?
– Шынын айтқанда, қиын жекпе-жектер аз болған жоқ. Бірақ ең күрделісі - рингтен тыс түрлі қиындықтарды еңсеріп, соған қарамастан жаттығу жасап, жекпе-жекке тыңғылықты дайындалу болды.
– Кәсіпқой бокста әлі қанша жекпе-жек өткізуді жоспарлап отырсыз?
– Бұл сұраққа нақты жауап беру қиын. Екі жекпе-жек өткізуім де мүмкін, он шақты айқас өткізуім де мүмкін. Барлығы уақыттың еншісінде.
– Қазақ боксшыларын бақылап жүресіз бе? Кімнің өнері сізге көбірек ұнайды?
– Әрине, отандастарымыздың жекпе-жектерін үнемі бақылап отырамын, жаңалықтарды оқимын. Қазақстанда өте талантты боксшылар жетерлік, олардың жетістіктері көңіл қуантады.