Шираз Әлімханұлымен жекпе-жекке арналған сауда-саттықтан кейін қиын таңдау алдында қалды
Екінші орта салмақтағы WBO әлем чемпионы Хамза Шираз Қазақстаннан шыққан міндетті үміткер Жәнібек Әлімханұлымен жекпе-жектен бас тартқан жағдайда, оның салдарына тап болуы мүмкін. Жағдайдың ықтимал өрбуіне Boxingnews24.com басылымы талдау жасады, деп хабарлайды Sports24.kz.
16 қыркүйекте WBO жекпе-жекті ұйымдастыру құқығына арналған промоутерлік сауда-саттық өткізді. Жеңісті Шираздың мүддесін қорғайтын Queensberry Promotions иеленді — компания 1,189 миллион доллар ұсынды, ал Top Rank-тың ұсынысы 820 мың доллар болды. Осылайша титулдық жекпе-жекті өткізу құқығы британдық промоутерге бұйырды.
Басылымның атап өтуінше, гонорар мөлшері Шираздың шешім қабылдауына әсер ететін фактор болуы мүмкін. Бұған дейін британдық боксшы Mr. Verzace подкастында ықтимал жекпе-жектің қаржылық шарттары туралы айтып, алдағы қарсыласын мансабындағы ең күрделі сынақ деп атаған.
«Қомақты емес жүлде қоры Ширазды тығырыққа тіреп, оны таңдау жасауға мәжбүр етті: чемпиондық белбеуін тәуекелге тігу немесе ең қауіпті қарсыласымен кездесуден ашық түрде жалтару», — деп жазады басылым.
Қаржылық шарттар анықталғаннан кейін жекпе-жектен бас тарту британдық чемпионның беделіне кері әсер етуі мүмкін.
«Енді қаржылық шарттар анықталған соң, жекпе-жектен бас тарту чемпионды өте тиімсіз жағдайға қалдырады. Егер ол Жәнібекпен кездесуден қашу үшін белбеуінен бас тартса, бұл жекпе-жектен ашық түрде жалтару ретінде қабылданады», — делінген жарияланымда.
Сондай-ақ Boxingnews24.com Шираз екінші орта салмақтан кеткен жағдайда мансабын Zuffa Boxing ұйымында жалғастыруы мүмкін екенін жоққа шығармайды. Дегенмен басылымның пікірінше, бұл нұсқа британдық боксшыны Әлімханұлымен жекпе-жектен бас тартудың беделге қатысты салдарынан құтқармайды.
Дереккөздің мәліметінше, жекпе-жектің ықтимал күндері ретінде 28 қараша мен 5 желтоқсан қарастырылып жатыр, ал өткізу орнының негізгі нұсқалары қатарында Лондон мен Нью-Йорк аталады.
