«Заруцкийді қалдыру керек еді». Сарапшы Анарбеков ойынында құлдырау болғанын айтты
Бұған дейін Қазақстанның бірқатар клубын басқарған танымал футбол маманы Алмас Күлшинбаев Sports24.kz сайтына берген эксклюзивті сұхбатында Алматы клубының өз алаңында «Тобылдан» ірі есеппен (1:4) жеңілгеннен кейін «Қайраттың» негізгі қақпашысы Темірлан Анарбековтың сенімсіз ойынына назар аударды.
«Анарбеков екі рет қателесті деуге болады. Қазір оның ойынында құлдырау немесе шаршау болуы мүмкін. Себебі неде? Әр жас футболшының басынан өтетін жағдай ғой, меніңше, бәріміз де кезінде бастан өткердік. Бәлкім, аздап жұлдыз ауруына шалдыққан шығар — бұл менің болжамым. Бірақ дәл қазір ол бұл кезеңнен өтіп кеткен шығар, өйткені Шымкентте екі гол жібергені есімізде, деуге болады, сол голдар оның қателігінен соғылды. Жалпы, Анарбеков шаршаған немесе ойынында құлдырау бар деп ойлаймын», - деп болжады Күлшинбаев.
Сарапшы Анарбековтың ойын формасының төмендеуіне тағы бір ықтимал себеп ретінде «Қайратта» негізгі қақпашы орны үшін бәсекелестіктің жоқтығын атады.
«Қазір ол іс жүзінде жалғыз өзі ойнап жүр (бұл Калмурзаға айтылған сын емес — ред.), бірақ ол әлі жас әрі толыққанды алмастыра алмайды деп ойлаймын. Мәселе — бәсекелестікте. Қандай да бір қақпашыны алу керек еді, немесе сол Заруцкийді қалдыру қажет болатын, бәрібір тәжірибелі қақпашы ғой», - деп есептейді маман.
Кім кім?
Темірлан Анарбеков өткен жылдың күзінен бері алматылық «Қайраттың» негізгі қақпашысы. Оның ең жарқын жетістігі шотландиялық «Селтикке» қарсы қарымта матчта тіркелді: ол пенальтилер сериясы кезінде бірнеше соққыны қайтарды. Осы маусымда Анарбеков күрделі сейвтерімен қатар, бірнеше рет нәтижелі қателіктерге жол берді және жанкүйерлер мен сарапшылардың пікірінше, қайтаруға болатын соққыларға төтеп бере алмады. «Тобылға» қарсы соңғы ойында Анарбеков төрт гол жіберіп алды: голдардың бірі оның қақпадан шығу кезіндегі сенімсіз ойынынан кейін соғылса, тағы бірі оның қорғаушыға прессинг астында берген пасынан кейінгі доп жоғалту нәтижесінде тіркелді.
«Қайраттың» қосалқы қақпашысы — Шерхан Қалмырза. Осы маусымда ол негізгі команда сапында өте сирек алаңға шықты: негізінен Кубок матчтарында және «Андерлехтке» қарсы қарымта кездесуде ойнады. Сондай-ақ ол Бірінші лига матчтарында «Қайрат-Жастар» құрамында өнер көрсетті. Ал маусым айында Шерхан Қазақстанның U-21 жастар құрамасы сапында дебют жасады.
Александр Заруцкий — «Қайраттың» бұрынғы негізгі қақпашысы. Ол клубпен бірге Қазақстан чемпионы атанды (2025). Өткен маусымның соңында негізгі құрамдағы орнынан айырылғаннан кейін клубтан кетті. Осы маусым басталар алдында Заруцкий «Ақтөбеге» ауысып, команданың негізгі қақпашысына айналды.
