Сабырхан мен Ишаиш: Азия чемпионатынан кейінгі реванш және Азия ойындарының алтыны
Аичи және Нагоя қалаларында өтіп жатқан 2026 жылғы Азия ойындарының финалында Азия чемпионатының шешуші жекпе-жегі қайталанады. Қазақстандық боксшы Төрехан Сабырхан 70 келіге дейінгі салмақта Иордания өкілі Зияд Ишаишпен қайта кездеседі, деп хабарлайды Sports24.kz.
Олардың алғашқы кездесуі 2026 жылдың 10 сәуірінде Ұлан-Баторда өткен Азия чемпионатының финалында болды. Ол кезде Сабырхан әлем чемпионы мәртебесіне ие еді. Қазақстандық боксшы 2025 жылы Ливерпульде 70 келіге дейінгі салмақта әлем чемпионы атанған болатын. Ал Ишаиш сол уақытта Азияның мықты боксшыларының бірі саналып, Олимпиада ойындарына қатысу тәжірибесіне ие еді.
Сабырхан жекпе-жекті жақсы бастап, алғашқы үш минуттан кейін төрешілердің есептерінде 4:1 есебімен алға шықты.
Алайда Ишаиш жекпе-жестің барысын өзгерте алды. Екінші раундта иорданиялық боксшы есепті теңестіріп, соңғы үш минутқа дейін төрешілердің хаттамасында тепе-теңдік орнады. Чемпион тағдыры шешуші раундта анықталуы тиіс еді.
Шешуші үш минутта Ишаиш басым түсіп, жеңіске жетті.
Азия ойындарындағы реванш
Сәуірдегі жеңілістен кейін Сабырхан жағдайды түзетуге жылдың басты құрлықтық додасында мүмкіндік алды.
2026 жылғы Азия ойындарында қазақстандық боксшы финалға дейін жетіп, жартылай финалда Өзбекстан өкілі Шавкатжон Болтаевты 5:0 есебімен сенімді жеңді. Жекпе-жектен кейін Төрехан финалда дәл Ишаишпен қайта кездескісі келетінін ашық айтты.
«Мен Ишаишпен кездескім келеді. Себебі бұған дейін Азия чемпионатында одан жеңілдім. Енді реванш алғым келеді», — деді Сабырхан жартылай финалдан кейін.
Ишаиш те екінші алтынға таласады
Зияд Ишаиштың финалға дейінгі жолы да сәтті болды. Турнирдегі алғашқы жекпе-жегінде иорданиялық боксшы Палестина өкілі Мұхаммад Иссаны жеңді. Кейін Тәжікстаннан келген Шамшер Саидовтан басым түсіп, жартылай финалда жапониялық Сэун Окадзаваны ұтты.
Ишаиш үшін бұл Азия ойындары 2018 жылғы көрсеткішін жақсартуға мүмкіндік береді. Ол Джакартадағы Азия ойындарында қола медаль жеңіп алған болатын. Ал қазір иорданиялық боксшы кем дегенде күміс жүлдеге кепілдік беріп отыр.
Шешуші жекпе-жек алдында Ишаиш өзара кездесулер бойынша 1:0 есебімен алда.
70 келіге дейінгі салмақтағы финал 2 қазанда өтеді. Сабырхан жеңіске жетсе, өзара кездесулердегі есепті теңестіріп, Азия ойындарының чемпионы атанады.
Сондай-ақ Қазақстан атынан 90 келіден жоғары салмақта Айбек Оралбай Азия ойындарының финалына шықты. Ол алтын медаль үшін Өзбекстан өкілі Жахонгир Зокировпен кездеседі.
