Ерасыл Жақпеков әлем чемпионатындағы даулы төрешілік шешімдерден кейін жекпе-жекте жеңілді
Қазақстандық боксшы Ерасыл Жақпеков Дубайда өтіп жатқан IBA ұйымдастырған 2025 жылғы әлем чемпионатының 1/8 финалында шаршы алаңға шықты.
80 келі салмақтағы қазақстандықтың қарсыласы әлем чемпионаты-2021-дің күміс жүлдегері Жамбулат Бижамов болды.
Үшінші раундта Жақпеков қарсыласын нокаутқа түсіре жаздады. Рефери нокдаунды санады, бірақ жекпе-жекті тоқтатпады.
Нәтижесінде, төрешілердің 4:1 бөлек шешімімен жеңіс Бижамовқа берілді.
Төрт төреші 29:28 есебімен ресейлікке жеңіс берсе, тек қырғызстандық төреші 29:28 есебін қазақстандыққа ұсынды.
Интернетте бұл жекпе-жекке қатысты талқылаулар кезінде төрешілердің шешімі дұрыс болмауы мүмкін деген пікірлер айтылуда.
Бұл Жақпековтың мансабындағы алғашқы әлем чемпионаты болды, ол былтыр жастар арасында Азия чемпионы атанған еді.