Ең әдемі қазақ боксшысы нокаутпен әлемдік UBO белбеуін жеңіп алды
5 қыркүйек күні Алматы үлкен бокс кешінің куәсі болды. Рингке әлі жеңіліс дәмін татпаған қазақстандық боксшы Балауса Мұздыман (8-0, 6 КО) шығып, Universal Boxing Organization (UBO) нұсқасы бойынша әлем чемпионы атағы үшін айқас өткізді.
27 жастағы спортшының қарсыласы – тәжірибелі үндістандық панчер Мамта Сингх (8-2-1, 5 КО) болды. Екінші жеңіл салмақ дәрежесіндегі бұл жекпе-жек бастапқыда тартысты өтеді деп күтілген еді. Алайда, Мұздыман қарсыласына еш мүмкіндік қалдырмады. Төртінші раундта-ақ Балауса қарсыласын нокаутқа жіберіп, титулдық айқаста түбегейлі басымдығын дәлелдеді.
Осылайша, Мұздыман кәсіпқой рингтегі тоғызыншы жеңісіне қол жеткізіп, алғаш рет UBO нұсқасы бойынша әлем чемпионы атанды.
Айта кетейік, биылғы маусымда да қазақстандық боксшы Алматы төрінде ерекше жеңіске жеткен болатын. Ол кезде ол мысырлық спортшы Аия Рамаданды айқын нокаутпен тоқтатты.