«Бірдеңе дұрыс болмаған». Допинг даудан кейін Әлімханұлының қарсыласы чемпионға қатаң пікір білдірді
Доминикандық боксшы Карлос Адамес қазақстандық Жәнібек Әлімханұлының атына қатысты туындаған допинг-дау аясында өткір пікір білдірді. Оның айтуынша, чемпионның рингтегі әрекеттері мен физикалық жағдайы бұған дейін-ақ күмән тудырған.
«Мен әрдайым ашық сөйлеймін. Бұл жағдай – қорқақтықтың көрінісі. Оның жекпе-жектерін көргенде, бірдеңе дұрыс емес екенін сезетінмін. Өзі әлсіреп тұрғандай көрінетін, бірақ әр соққысы өте ауыр тиетін. Оның бойында бір қалыптан тыс нәрсе бар сияқты әсер қалдыратын», – деді Адамес.
Доминикандық боксшы асығыс қорытынды жасамағанын да атап өтті. Оның айтуынша, бәрін жеке өзі рингте тексергісі келген. Адамес Жәнібек Әлімханұлымен бетпе-бет кездесіп, оның шынымен қаншалықты мықты, жылдам әрі қауіпті екенін сыртқы факторларсыз көргісі келгенін жеткізді.
Еске сала кетейік, Жәнібек Әлімханұлы кәсіби рингте әлі жеңіліс көрмеген – 17 жеңіс, оның 12-сі нокаутпен аяқталған. Соңғы жекпе-жегін ол 5 сәуір күні өткізіп, француз боксшысы Нгамиссенгені сенімді түрде ұтқан. Қазіргі таңда В сынамасының ашылуы күтілуде, дәл осы нәтиже чемпионның болашақ тағдыры мен мансабына қатысты шешуші рөл атқармақ.