Ангелина Лукас әлемдік рейтингте екінші орынға көтерілді
Қазақстандық кәсіпқой боксшы Ангелина Лукас әйелдер боксы тарихында маңызды жетістікке қол жеткізді.
Спортшы өзінің Instagram парақшасында әлемдік рейтингтің үздік екідігіне енгенін және абсолют чемпион атағы үшін жекпе-жек өткізуге мүмкіндік алғанын хабарлады.
«Қазақстан әйелдер кәсіпқой боксы тарихында тұңғыш рет қазақстандық әлемдік рейтингте топ-2 қатарына енді», – деп жазды Лукас.
Ангелина Лукас – IBO, WBF, WIBF және WBC нұсқалары бойынша әлем чемпионы. Соңғы жекпе-жегін ол Боливия боксшысы Есения Токомен өткізді. Стамбулда өткен жекпе-жек сегіз раундқа жоспарланған болатын (әр раунд – 2 минут), алайда екінші раундта техникалық нокаутпен аяқталды. Лукас соққысының астында қалған қарсыласы жекпе-жекті жалғастырудан бас тартты.
Кәсіпқой рингте Лукас 15 кездесу өткізіп, оның 14-інде жеңіске жеткен (7 – нокаутпен) және тек бір рет жеңілген.