«Бұл саған Қазақстан емес»: Резниковтың қарсыласы реванш алдында өжет мәлімдеме жасады
ACA-ның жеңіл салмақтағы әзербайжандық файтері Заур Гаджиев қазақстандық Артем Резниковпен алдағы реванш туралы пікір білдірді. Оның айтуынша, екінші жекпе-жек алғашқы кездесуден кейінгі «жабылмаған гештальтты» жабуы тиіс, деп хабарлайды Sports24.kz.
Заур Гаджиев Артем Резниковпен реванш өткізу мәселесі қаралып жатқанын растады. Әзербайжандық файтердің айтуынша, әзірге жекпе-жекке қатысты ресми анонс жасалған жоқ, алайда ACA матчмейкерлері бұл кездесу туралы онымен сөйлескен. Гаджиев жекпе-жекке келісім бергенін мәлімдеді.
«Бәрі осыған қарай бет алып келеді, тек анонс болған жоқ. Матчмейкерлер бұл жөнінде менімен сөйлесті, мен келісімімді бердім. Осы жабылмаған гештальтты жабуға болады», - деді Гаджиев.
Гаджиев Санкт-Петербургтегі турнирде Резниковқа көрсетілуі мүмкін қолдау туралы да пікір білдірді. Оның ойынша, қазақстандық файтер өзін ол жерде үйдегідей сезінеді деп үміттенсе, қателеседі. Әзербайжандық спортшы залдағы көрермендердің басым бөлігі дәл оны қолдайтынын мәлімдеді.
«Резников бұл жерде өз адамы боламын деп ойлайды, бірақ қатты қателеседі. Ол өзін қолдайтындар болатынын жазып жүр. Сені ең көп дегенде "Русская трибуна" қолдайды. Негізгі зал мен үшін жанкүйерлік етеді. Мұнда менің аудиториям үлкен: қаншама бауырым, досым, туысым және туыстарымның туыстары бар», - деді Гаджиев.
Әзербайжандық файтер мәлімдемесін қазақстандық қарсыласына бағытталған қатқыл сөздермен аяқтады.
«Бұл саған Қазақстан емес, Артем. Мұнда саған төрешілер көмектеспейді. Сенің хайпың аяқталады, мен сені зейнетке жіберемін», - деді Гаджиев.
Бұл сөздерді MMA.Metaratings.ru жариялады. Гаджиев пен Резниковтың реваншы 25 желтоқсанда өтеді деп күтілуде.
ACA турнирі Санкт-Петербургте өтуі тиіс. Екі файтер үшін де бұл жекпе-жек алғашқы қарсыластықтан кейін нүкте қоюға мүмкіндік береді. Олардың алғашқы кездесуі маусым айында ACA 205 турнирінде өтіп, төрешілердің бөлінген шешімімен тең аяқталған.
Заур Гаджиевтің еншісінде төрт жеңіс, бір жеңіліс және бір тең нәтиже бар. Артем Резниковтың кәсіби аралас жекпе-жектердегі тәжірибесі әлдеқайда мол. Қазақстандық файтердің рекордында 26 жеңіс, 11 жеңіліс және бір тең нәтиже тіркелген.
Енді қарсыластар жыл соңында қайтадан тор ішінде кездесуі мүмкін.
