Роналдусыз, бірақ төрт голмен: Португалия Копенгагенде шоу жасады
Португалия құрамасы Криштиану Роналдудың ұлттық командадан резонансты түрде кетуінен кейін алғаш рет алаңға шықты. Копенгагенде Жорже Жезуш командасы нәтижелі ойын көрсетіп, Данияны 4:2 есебімен ұтты, деп хабарлайды Sports24.kz.
Қонақтар кездесудің басынан-ақ белсенді ойнады. 13-минутта Гонсалу Рамуштың пасынан кейін Жоау Канселу есеп ашты.
Даниялықтар көп күттірмей жауап берді. 23-минутта Миккель Дамсгор таразы басын теңестірді. Алайда 1:1 есебі небәрі екі минут сақталды. 25-минутта Бруну Фернандештің пасынан кейін Гонсалу Рамуш Португалияны қайта алға шығарды.
Үзілістен кейін алаң иелері тағы бір мәрте есепті теңестірді. 53-минутта Расмус Хойлунд есепті 2:2-ге жеткізіп, матчтағы интриганы қайта жандандырды.
Кездесудің шешуші сәттерінің бірі 67-минутта болды. Витинья Португалияның шабуылын нәтижелі аяқтап, қонақтарды үшінші рет алға шығарды. Бұл голда да Бруну Фернандеш ассист жасады. Осылайша, ол матчты екі нәтижелі паспен аяқтады.
Дания соңына дейін есепті құтқаруға тырысты, бірақ соңғы сөз португалиялықтарда қалды. 87-минутта Жоау Феликс төртінші голды соғып, матч тағдырын біржола шешті.
УЕФА Ұлттар лигасы-2026/27. А лигасы, 4-топ. 3-тур
Дания – Португалия – 2:4 (1:2)
Голдар: Канселу, 13 (0:1), Дамсгор, 23 (1:1), Гонсалу Рамуш, 25 (1:2), Хойлунд, 53 (2:2), Витинья, 67 (2:3), Жоау Феликс, 87 (2:4).
Бұл кездесуге Криштиану Роналду төңірегіндегі жағдай да ерекше реңк берді. 41 жастағы шабуылшы бұған дейін ұлттық құрама орналасқан жерден кетіп қалып, Копенгагендегі матчқа қатысқан жоқ.
Оған дейін Португалия Уэльсті 1:0, Норвегияны 2:1 есебімен жеңген еді. Осылайша, команда қатарынан үшінші жеңісіне қол жеткізіп, тоғыз ұпай жинады және топтағы көшбасшылығын сақтап қалды.
Дания үш турдан кейін үш ұпаймен қалды. Португалия келесі матчын 4 қазанда өз алаңында Норвегияға қарсы өткізеді.
