Роналду кетті, жанкүйерлер де соңынан ерді: Португалия құрамасы екі миллионға жуық оқырманынан айырылды
Криштиану Роналду мен Португалия құрамасының арасындағы жағдай футбол алаңынан тыс үлкен талқыға ұласты. Капитанның ұлттық команда орналасқан жерден күтпеген жерден кетуінен кейін жанкүйерлер Португалия құрамасының Instagram-дағы ресми парақшасынан жаппай жазыла бастады, деп хабарлайды Sports24.kz.
Жанжалға дейін құраманың парақшасына 25 миллионға жуық адам жазылған еді. Ал алғашқы тәуліктің өзінде аудитория шамамен 1,1 миллионға азайды. 4 қазанға қарай бұл көрсеткіш 23 миллионға жуықтады. Осылайша бірнеше күн ішінде Португалия құрамасы екі миллионға жуық оқырманынан айырылды.
Бұған дейін Португалия Instagram-дағы ең танымал ұлттық футбол құрамасы саналған. Алайда жаппай жазылудан бас тартудан кейін бірінші орынға 25 миллионнан астам оқырманы бар Бразилия құрамасы шықты. Ал Роналдудың өзі әлі де платформаның ең танымал қолданушысы болып отыр - оның жеке парақшасына жүздеген миллион адам жазылған.
Оқиғаның бәрі Ұлттар лигасындағы Норвегияға қарсы матчтан кейін басталды. Роналду ойын бойы қосалқы құрамда қалып, кездесудің бір сәтінде қызынуға шыққанымен, алаңға кірмеді. Кейін Жорже Жезуш капитандық мәртебе негізгі құрамнан орын алуға кепілдік бермейтінін ашық айтты. Даниямен матч алдында да бапкер шабуылшыны бастапқы құрамға қоспауға ниетті болған. Осыдан кейін көп ұзамай Криштиану Копенгагендегі ұлттық құраманың базасынан кетіп қалды.
Кейін 41 жастағы футболшы бұл шешімін өзі де растады. Роналду кетер алдында Португалия футбол федерациясының президенті Педру Проэнсамен сөйлескенін айтып, мұндай қадамға не себеп болғанын кейінірек түсіндіруге уәде берді.
Алайда оқиға мұнымен аяқталған жоқ. Жағдайға Джорджина Родригес те араласты.
Алғашында ол Роналдудың мәлімдемесін сторисіне бөлісіп, жүрек белгісін қалдырумен шектелген. Бірнеше күннен кейін оның реакциясы әлдеқайда қатаң болды.
Джорджина «Манчестер Юнайтедтің» бұрынғы бас бапкері Алекс Фергюсонға телінген сөздер жазылған жарияланымды бөлісті. Онда Жезуштың Роналдуды құрамаға шақырып, бастапқыдан-ақ оған маңызды рөл беруді жоспарламағаны сыналған. Родригес оған өз пікірін қосып: «Бұл адамның Христостың есімін қалай алып жүргенін түсінбеймін», - деп жазды. Осылайша ол португалиялық маманның Хесус деген тегіне ишара жасады.
Кейін Фергюсонға телінген бұл сөздердің расталмағаны белгілі болды. Осыдан соң Джорджина сторисін өшірді. Дегенмен оның скриншоттары әлеуметтік желілер мен БАҚ-та тарап үлгерген еді.
Ал Португалия құрамасы капитансыз алғашқы кездесуінде Данияны 4:2 есебімен жеңді. Голдарды Жоау Канселу, Гонсалу Рамуш, Витинья және Жоау Феликс соқты. Үш турдан кейін Жезуштың командасы барлық матчта жеңіске жетіп, Ұлттар лигасындағы өз тобында көш басында қалды.
Жеңіске қарамастан, Роналду төңірегіндегі әңгіме басылар емес. Бруну Фернандеш команда ішінде жік пайда болды деген ақпаратты көпшілік алдында жоққа шығарып, Криштианудың Португалия футболы үшін маңызы зор екенін атап өтті. БАҚ мәліметінше, федерация Роналду мен Жезушты қайта кездестіріп, екі тарап арасындағы жағдайды реттеуге әрекет жасап жатыр.
