«Ордабасы» чемпиондық атаққа қарай жүйткіп келеді: ҚПЛ турнирлік кестесі қалай көрінеді
Қазақстан Премьер-лигасының кезекті турындағы матчтар аяқталды, деп хабарлайды Sports24.kz тілшісі.
28-турдағы кездесулерінде чемпиондық атаққа таласып жатқан «Ордабасы» мен «Қайрат» өз қарсыластарын жеңді. Андрей Мартиннің командасы «Қайсарды» ойсырата жеңіп, 4:1 есебімен басым түсті. Ал қазіргі чемпион матч соңында «Жетісудың» қарсылығын әрең бұзды (1:0).
Осылайша, «Ордабасы» «Қайраттан» төрт ұпай алшақтықты сақтап қалды. ҚПЛ маусымы аяқталғанға дейін екі командаға да үш матчтан ойнау қалды.
Алғашқы үштікті қоржынында 48 ұпайы бар «Астана» түйіндеп тұр. Одан кейін «Ақтөбе» келеді. Игорь Черевченконың командасы елордалық клубтан үш ұпайға қалып келеді, алайда бір матч артық өткізген. «Оқжетпестің» көрсеткіші ақтөбеліктермен бірдей: 27 ойыннан кейін 45 ұпай.
Алғашқы ондыққа сондай-ақ «Елімай» (38 ұпай), «Тобыл» (37), «Ұлытау» (35), «Жеңіс» және «Каспий» (екеуінде де 32 ұпайдан) кіреді.
Төменгі лигаға түсіп қалу аймағында әлі де «Қайсар» (24 ұпай) мен «Жетісу» (22 ұпай) тұр.
ҚПЛ-дың келесі туры 17-18 қазанда өтеді. «Ордабасы» сырт алаңда «Ақтөбеге» қарсы ойнаса, «Қайрат» «Ертісті» қабылдайды.
