Бастау әрдайым қиын: Артета АПЛ-дің 1-турындағы «Арсеналдың» ірі жеңісі туралы пікір білдірді
Лондондық «Арсеналдың» бас бапкері Микель Артета ағылшын Премьер-лигасының 1-турындағы «Ковентри Ситиге» қарсы кездесу нәтижесіне пікір білдірді (0:3), деп хабарлайды Sports24.kz.
– Микель, сіз АПЛ-ға тек титулды қорғау емес, шабуыл жасау керек деп айтқанда, осыны меңзедіңіз бе?
– Иә, біздің ойынымызда ұнайтын жайттар көп болды. Бұл, әрине, керемет нәтиже. Бірақ матчты сондай үстемдікпен, айқындықпен, түсіністікпен және ойынның ширақтығымен бастағанымыз ерекше әсерлі болды. Иә, бұл тамаша болды. Себебі бастау әрдайым қиын. Біз де дайындыққа көп уақыт жұмсаған командаға қарсы ойнадық. Олар өз ісінің шеберлері. Бірақ бүгінгі көргенім мені қатты таңғалдырды.
– Микель, чемпион ретінде келгенде командада өзгеше көңіл-күй байқадыңыз ба?
– Мүмкін, бүгінгі командада былтырғыға қарағанда күйзеліс аз болған шығар. Бұл туралы үнемі сұрайды. Меніңше, ойыншылардың түрі бұрынғыдай. Әр футболшының ішінде не болып жатқанын білмеймін. Бірақ мен оларға жеткізгенім – одан да үлкен құлшыныс пен алға ұмтылыс болды. Басқалардан үздік болуға лайық болу керек екенін айттым. Бізге осы маңызды.
– Өткен маусымда кейде стадионда жанкүйерлердің қобалжуы сезілетін. Бірақ бүгін сіз жанкүйерлерді еркін сезінуге ынталандырдыңыз. Бүгін стадионда жаңа энергияны сезіндіңіз бе?
– Қазір көрейік, есеп 0:0 болғанда немесе жеңіліп жатқанда не болатынын. Сол кезде реакцияны байқаймыз. Бүгін матчтың басында екі гол бірден соғылды. Бұл, әрине, жақсы серпін. Барлығы өзін осылай сезінгені заңдылық. Бірақ өткеннен сабақ алдық. Командаға не көмектесетінін енді түсіндік. Мұндай атмосферада футбол ойнау – нағыз ләззат.
«Арсенал» чемпионатты үш ұпаймен бастап, уақытша турнир кестесінің көшін бастады. Келесі турда Микель Артетаның командасы 31 тамыз күні сырт алаңда «Астон Вилламен» кездеседі, ал Фрэнк Лэмпардтың шәкірттері 29 тамызда «Халл Ситиді» қабылдайды.
