Қазақстандық функционер Ұлттар лигасының матчына тағайындалды: мән-жайы белгілі
Қазақстандық функционер Олжас Абраев С2 тобындағы Армения және Латвия құрамалары арасындағы Ұлттар лигасының матчына УЕФА делегаты ретінде тағайындалды, деп хабарлайды Sports24.kz.
Оның міндетіне инфрақұрылым нысандарында және қауіпсіздік мәселелерінде регламент талаптарының сақталуын, сондай-ақ басқа да әкімшілік және ұйымдастырушылық жұмыстарды бақылау кіреді.
Айтпақшы, УЕФА бұл ойынға халықаралық ресми тұлғалар бригадасын тағайындады. Төрешілер бригадасы толықтай словениялық болады, оны төреші Мартин Матоша басқарады. Видеоассистенттер қатарында Ален Борощак бар, ал төрешілік бақылаушысы қызметіне швециялық Мартин Ингварссон тағайындалды.
Қазақстанмен бір топта, яғни Ұлттар лигасының С лигасында өнер көрсететін Армения мен Латвия арасындағы матч 25 қыркүйекте Астана уақытымен 21:00-де Еревандағы Вазген Саргсян атындағы Республикалық стадионда өтеді.
Еске салайық, бұған дейін Абраевтың әріптесі Қуаныш Қанапьянов дәл осындай қызметке тағайындалған болатын. Ол Чемпиондар лигасының негізгі кезеңіндегі пражалық «Славия» мен француздық «Ланс» арасындағы матчта жұмыс істейді.
