Қазақстан футбол федерациясының президенті: ол кім және қандай қызмет атқарды?

Футбол Бүгін 09:19

Қазақстан футбол федерациясының президенті: ол кім және қандай қызмет атқарды?

ФОТО: KFF

20 желтоқсан күні Марат Омаров Қазақстан футбол федерациясының президенті болып сайланды. ҚФФ-ның 36 жастағы жаңа президенті осы уақытқа дейін бірқатар мемлекеттік мекемелерде басшылық қызметтер атқарған.

Қазақстан Республикасы Бәсекелестікті қорғау және дамыту агенттігінің мәліметінше, Омаров Марат Талғатұлы 1988 жылы 20 қыркүйекте дүниеге келген. Ол 2010 жылы “Болашақ” бағдарламасы бойынша Ұлыбританиядағы Йорк университетін “Философия, саясаттану, экономика” мамандығы бойынша тәмамдап, 2011 жылы Лондон экономика және саяси ғылымдар мектебін (LSE) әлеуметтік ғылымдар магистрі дәрежесінде бітірген.

2012-2014 жылдары – Экономикалық даму және сауда, кейіннен – Экономика және бюджеттік жоспарлау, Ұлттық экономика министрінің кеңесшісі қызметін атқарған. 2014-2016 жылдары – ҚР Ұлттық экономика министрлігінің тарифтік және институционалдық саясатты қалыптастыру департаменті директорының орынбасары болған. 2016-2017 жылдары – “Қазақтелеком” АҚ-ның басқарушы директоры болып еңбек еткен. 2017-2019 жылдары – “Технологиялық даму жөніндегі ұлттық агенттік” АҚ Басқарма төрағасы, трансформациядан кейін – “QazTech Ventures” АҚ Басқарма төрағасы (“Бәйтерек” ҰБХ АҚ құрылымына кіреді) қызметін атқарған.

2019 жылдан бастап 2020 жылдың қазанына дейін – “Бәйтерек” ҰБХ АҚ басқарушы директоры – Басқарма мүшесі болған. Сондай-ақ “Қазақстанның тұрғын үй құрылыс жинақ банкі” АҚ, “Қазына Капитал Менеджмент” АҚ, “Қазақстанның Даму Банкі” АҚ Директорлар кеңесінің мүшесі болған.

2020 жылдың қазанынан 2022 жылдың тамызына дейін – ҚР Бәсекелестікті қорғау және дамыту агенттігі төрағасының орынбасары лауазымына тағайындалған. 2022 жылдың 16 тамызынан бүгінгі күнге дейін ҚР Бәсекелестікті қорғау және дамыту агенттігінің төрағасы қызметін атқарған.

Айта кетейік, кезектен тыс XXVII конференциясының нәтижесі бойынша “Астана қаласы футбол федерациясы қауымдастығы” ЗТБ атынан сайлауға түскен Омаров Марат Талғатұлы 34 дауыспен жеңіске жетіп, Қазақстан футбол федерациясының президенті атанды.