«Қаланы сағындым». «Ордабасы» командасының экс-ойыншысы Шымкенттегі тең ойын туралы пікір білдірді
Елордадағы «Жеңіс» командасының украиналық оң қанат вингері әрі шымкенттік «Ордабасының» бұрынғы ойыншысы Владислав Наумец Sports24.kz тілшісіне берген эксклюзивті сұхбатында Шымкентке оралғаннан кейінгі эмоциясымен бөлісті.
«Бұл жермен әрдайым жылы естеліктер байланысты. Жігіттерді де, қаланы да сағындым — мұнда атмосфера өте керемет. Бұл ессіз ойын болды. Осы стадионда ойнау — әрдайым үлкен қуаныш.
Біз бұл матчқа әр ойынға дайындалатындай дайындалдық. Олардың чемпион атануы мүмкін екенін білдік, бірақ бізге де ұпай қажет болды. Бұл — футбол, мұнда кез келген жағдай орын алуы мүмкін», — деді футболшы.
Кеше Қазақстан Премьер-лигасының 25-туры аясындағы матчта шымкенттіктер өз алаңында елордалық «Жеңісті» жеңе алмады — 1:1.
Көк-ақ түстілердің чемпиондық тағдыры бүгін «Ақтөбе» — «Қайрат» матчынан кейін шешіледі. Алаң иелерінің жеңісі «Ордабасының» чемпион атануына мүмкіндік береді.
Наумец «Ордабасы» сапында 2025 жылдың жазынан 2026 жылдың жазына дейін өнер көрсетті. Ағымдағы жылдың жазында вингер еркін агент мәртебесімен «Жеңіс» командасына ауысты.
