«Қайраттың» қорғаушысы «Андерлехтпен» болатын қарымта ойын алдында мәлімдеме жасады
«Қайрат» қорғаушысы Лукас Африко эксклюзивті Sports24.kz сайтына берген сұхбатында УЕФА Еуропа лигасының плей-офф кезеңінің алғашқы матчында алматылық клубтың бельгиялық «Андерлехтке» өз алаңында ұтылғанына қатысты пікірін бөлісті.
«Бұл өте қиын ойын болды. Кейбір қателіктер жібердік. Әртүрлі сезімдемін, бірақ бұл біз үшін сабақ болды. Біз ешқашан үміт үзбеуіміз керек, осы маусымда күресуді жалғастыруымыз қажет. Бізде әлі екінші мүмкіндік бар, сол мүмкіндікті қолданайық. Әр ойынның өз ерекшелігі бар. Біз Брюссельге жеңіс үшін барамыз. Бас бапкердің бұл ойынға арналған жоспары бар деп ойлаймын», – деді бразилиялық легионер.
Еске салайық, УЕФА Еуропа лигасының плей-офф кезеңінің алғашқы матчында «Қайрат» Алматыда өз алаңында «Андерлехттен» 0:3 есебімен ойсырай ұтылды. Барлық голдар бірінші таймда соғылды.
Қарымта ойын 27 тамыз күні Брюссельде өтеді. Бейресми ақпарат бойынша, «Қайрат» чемпионаттағы нәтижеге басымдық беру үшін «Андерлехтпен» матчқа екінші құрамын жіберуі мүмкін.
