«Қайрат» үшін күрделі сынақ: Конференциялар лигасындағы қарсыластарының құрамы қанша тұрады
Алматылық «Қайраттың» 2026/27 маусымындағы Конференциялар лигасының негізгі кезеңінде кездесетін клубтар құрамының трансферлік құны белгілі болды, деп хабарлайды Sports24.kz.
Transfermarkt мәліметінше, Қазақстан чемпионына ойыншыларының жалпы құны «Қайрат» құрамының бағасынан әлдеқайда жоғары қарсыластар түскен.
Бұл көрсеткіш бойынша басты фаворит — италиялық «Аталанта». Оның құрамының құны 438,4 миллион еуроға бағаланады. Бергамо клубындағы ең қымбат ойыншы — бразилиялық жартылай қорғаушы Эдерсон. Оның трансферлік құны 45 миллион еуро деп көрсетілген.
Екінші орында грек «Панатинаикосы» тұр. Оның ойыншыларының жалпы құны 101,75 миллион еуроны құрайды. Афины командасындағы ең қымбат футболшы — Дания құрамасының сол қаптал қорғаушысы Виктор Кристиансен. Transfermarkt ойыншының құнын 9 миллион еуроға бағалайды. Сондай-ақ грек клубында бұрынғы мансабымен танымал Давиде Калабрия, Иньяки Пенья, Стефан де Врей және Мусса Сиссоко өнер көрсетеді.
Қаржылық тұрғыдан тағы бір мықты қарсылас — нидерландтық «Твенте». Оның құрамының құны 86,55 миллион еуроға бағаланған. Энсхеде клубының ең қымбат ойыншысы — 18 жастағы орталық қорғаушы Рууд Нийстад.
Одан кейін ойыншыларының құны 37 миллион еуроға бағаланатын Румынияның Крайова қаласының «Университатясы» келеді. Вингер Штефан Баиарамның құны 5 миллион еуро және ол румыниялық команданың ең қымбат футболшысы.
Швециялық «Мьельбюдің» көрсеткіші салыстырмалы түрде төмен — 17,65 миллион еуро. Ал латвиялық «Риганың» құрамы 15,58 миллион еуроға бағаланады. Швед командасының көшбасшысы Абдулла Икбалдың құны 3 миллион еуро болса, Латвия клубында Региналдо Рамирес 900 мың еуромен ең қымбат ойыншы саналады.
Осылайша, «Қайраттың» алты қарсыласының құрамдары шамамен 697 миллион еуроға бағаланады. Салыстыру үшін, Transfermarkt алматылық клуб ойыншыларының жалпы құнын небәрі 9,2 миллион еуро деп көрсетеді. «Қайрат» құрамындағы ең қымбат футболшы — Жоржиньо, оның Transfermarkt-тегі бағасы 1 миллион еуро.
