«Оған не себепті ойнауға рұқсат бергенін білмеймін»: Черчесов Самородовтың жарақатына наразы
Грозныйлық «Ахмат» клубының бас бапкері Станислав Черчесов шабуылшы Максим Самородовтың Қазақстан құрамасы сапында жарақатпен ойнағанын мәлімдеді. Қазақстандық шабуылшы Ресей Премьер-лигасы аясында «Балтикаға» қарсы өтетін матчқа клуб өтініміне енбеді, деп хабарлайды Sports24.kz.
«Ахмат» РПЛ-ның оныншы туры аясында «Балтикаға» қарсы матчты Максим Самородовсыз өткізеді. Қазақстандық шабуылшы грозныйлық клубтың негізгі құрамына енген жоқ. Оның үстіне, ол бұл ойынға қосалқы ойыншылар тізімінде де жоқ. Сондай-ақ «Ахматтың» өтінімінде тағы бір қазақстандық футболшы, қанат шабуылшысы Ғалымжан Кенжебек те жоқ.
Матч алдында «Ахмат» клубының бас бапкері Станислав Черчесов ұлттық құрамалардан оралған ойыншылардың жағдайына түсініктеме берді. Маман Самородов туралы жеке айтып, шабуылшының клубқа жарақатпен келгенін мәлімдеді.
«Жалпы, бәрі жаман емес жағдайда оралды. Бізде тек Самородов қана ойынға қатыспайды. Оған не себепті ойнауға рұқсат бергенін білмеймін, дегенмен жарақат кем дегенде үш апта емделуді қажет ететін. Кеше оған МРТ жасадық, тексеру дәрігерлеріміз жауап беруі тиіс мәселенің бар екенін көрсетті. Қазіргі уақытта ол жаттығуға қатыспайды. Қалғандарының бәрі оралды. Біреуі көбірек, біреуі азырақ ойнады, бірақ барлығының көңіл күйі жақсы», - деді Черчесов.
Осылайша, Самородовтың «Ахматтың» алдағы матчтарына қатысуы әзірге сұрақ күйінде қалып отыр. Черчесовтің айтуынша, ойыншы қазір жаттығу өткізбейді. Клуб МРТ нәтижесінен кейін дәрігерлердің қорытындысын күтуде. Бұған дейін Самородов пен Кенжебек жарақатына байланысты «Балтикаға» қарсы матчты өткізіп алуы мүмкін деген болжам айтылған болатын.
«Балтика» матч алдында тоғыз турдан кейін 11 ұпай жинаған, ал «Ахматтың» еншісінде 10 ұпай бар.
Айта кетейік, Қазақстан құрамасының тағы бір ойыншысы Ислам Чесноков та өз клубының матчына қатысқан жоқ. «Крылья Советов» қазақстандық жартылай қорғаушысыз «Спартакпен» тең ойнады. Осылайша, РПЛ-да өнер көрсететін бірнеше қазақстандық легионер тур матчтарын өткізіп алды.
