Муроджон Ахмадалиев уақытша WBA белбеуін жеңіп алып, абсолютті чемпионға шақыру тастады
Өзбекстандық Муроджон Ахмадалиев уақытша WBA (Бүкіләлемдік бокс қауымдастығы) белбеуі үшін өткен жекпе-жекте мерзімінен бұрын жеңіске жетті.
Ахмадалиевтің қарсыласы мексикалық Рикардо Эспиноса болды. Екінші жеңіл салмақтағы (55,2 кг-ға дейін) кездесу Монаконың Монте-Карло қаласында өтті. Жекпе-жек 12 раундқа жоспарланғанымен, үшінші раундтың соңында аяқталды. Ахмадалиев бір үш минуттық ішінде қарсыласын үш рет нокдаунға жіберіп, рефери жекпе-жекті тоқтатып, техникалық нокаут тіркеді.
30 жастағы өзбекстандық уақытша WBA белбеуін жеңіп алып, екінші жеңіл салмақтағы абсолютті әлем чемпионы жапондық Наоя Иноуэге шақыру тастады. Кәсіпқой рингте Ахмадалиев 13 жеңіс (10-ы нокаутпен) және 1 жеңіліс тіркеген. Әуесқой бокста ол 2016 жылғы Олимпиаданың қола жүлдегері атанды.
