Позициялардың төмендеуі: Шевченко мен Кукушкин АТР рейтингіндегі орындарын жоғалтты

Теннис 11 қара 2024 03:06

Аружан Темірбек

sports24 сарапшы

Жаңартылған Ассоциация кәсіби теннисшілерінің (ATP) рейтингі жарияланды.

Италиялық Янник Синнер әлемнің бірінші ракеткасы атағын сақтап қалды. Екінші орынды неміс Александр Зверев иеленсе, үшінші сатыда испандық Карлос Алькарас тұр.

Қазақстандық теннисшілер арасында ең жоғары орынға ие болған Александр Бублик 34-орында қалды. Александр Шевченко 16 сатыға төмендеп, 80-орынға түсті.

Қазақстандықтар арасынан топ-100-ге жақын тұрған Михаил Кукушкин де өз позициясын жоғалтып, 113-орынға түсті. Ал Дмитрий Попко мен Тимофей Скатов бұрынғы орындарын сақтап, тиісінше 176 және 195-орындарда тұр.

Жұптық санатта көшбасшылықты сальвадорлық Марсело Аревало мен хорват Мате Павич бөлісуде. Үшінші орынды испандық Марсель Гранольерс пен аргентиналық Орасио Себальос өзара бөлісті.

Қазақстандық Александр Недовесов 54-орыннан 58-орынға төмендеді, ал Бублик екі сатыға сырғып, жұптық рейтингте 122-орынға жайғасты.