ATP финалдық турнирінде жеңіске жеткен әлемнің бірінші ракеткасының табысы туралы ақпарат жарияланды

Теннис Бүгін 01:00

Аружан Темірбек

sports24 сарапшы

Италиялық теннисші Янник Синнер ATP Қорытынды турнирін жеңіспен аяқтап, қомақты жүлде қорына ие болды.

ATP (Кәсіби теннисшілер қауымдастығы) турниріндегі жеңісі үшін әлемнің бірінші ракеткасы 4 881 500 АҚШ долларын (шамамен 2 млрд 433 миллион теңге) иеленді. Финалдық кездесуде Синнер америкалық Тейлор Фрицті тізе бүктірді. Тейлордың жүлдесі 2 237 000 долларды (шамамен 1 млрд 115 миллион теңге) құрады. Бұл сома ерлер мен әйелдер арасындағы Қорытынды турнирлер тарихындағы ең жоғарғы көрсеткіш ретінде тіркелді.

Айта кетсек, Янник Синнер биыл алғаш рет ATP-нің Қорытынды турнирінде жеңімпаз атанды. Турнир барысында ол аустралиялық Алекс Де Минаурды, Тейлор Фрицті екі мәрте, ресейлік Даниил Медведевті және норвегиялық Каспер Руудты жеңді.