«Қарсыластарды алаңнан сыпырып тастады»: Диас Австралиядағы матчтар алдында ұлттық құрамадағы дебютін еске алды
Қазақстандық теннисші Зарина Диас ұлттық құрама сапындағы алғашқы ойыны туралы естелігімен бөлісіп, Билли Джин Кинг кубогы аясында өтетін Австралиядағы жарыстар алдындағы әсерін айтты.
- Ұлттық құрама сапында алғаш рет 15 жасымда өнер көрсеттім. Ол кездесу Австралияның Перт қаласында өтті. Біз жұптық матч ойнадық және қарсыластарымызды 6:0, 6:0 есебімен ойсырата жеңдік. Тіпті оларға еш мүмкіндік қалдырмадық. Жалпы, мен Австралияда бірнеше рет жарысқа қатыстым — жеке турнирлер де, құрама ойындары да болды. Мұндағы атмосфера өте жағымды, ойнаған маған қатты ұнайды, — деді Диас Қазақстан теннис федерациясының баспасөз қызметіне берген сұхбатында.
Билли Джин Кинг кубогының D тобының ойындары Австралияның Брисбен қаласында өтеді. Қазақстан құрамасы 10 сәуір күні Астана уақытымен таңғы 7:00-де Австралия құрамасына қарсы матч өткізеді. Ал 11 сәуір күні дәл осы уақытта Колумбия құрамасымен кездеседі.
Алты топтың жеңімпаздары Қытайда өтетін финалдық кезеңге жолдама алады. Бұл кезеңде олар турнир иелері — Қытай құрамасы және қазіргі чемпион — Италия құрамасымен бірге бақ сынайды. Өз тобында екінші және үшінші орын алған командалар плей-офф кезеңіне өтіп, аймақтық топтық турнирлердің үздік командаларымен кездеседі.
