Камилa Валиева Швейцарияның Федералды сотына жүгінді: істі қайта қарау мүмкін бе?
Спорттық арбитраж соты (CAS) өз тәжірибесіне сәйкес, мәнерлеп сырғанаушы Камила Валиеваның ісіне қатысты Швейцарияның Федералды сотында жүріп жатқан іс бойынша түсініктеме беруден бас тартады, деп хабарлады ТАСС.
Спортшы шығарылған шешімді қайта қарау туралы өтініш берген. Алайда, ресми мәлімдемелер мен бағалар тек Швейцария сотының түпкілікті шешімінен кейін жарияланады.
Еске салайық, 2024 жылғы қаңтарда Спорттық арбитраж соты Камила Валиеваға допинг ережелерін бұзғаны үшін төрт жылға спорттан шеттету жазасын тағайындап, 2021 жылдың 25 желтоқсанынан бастап оның барлық нәтижелерін жоққа шығарған болатын. Бұл шешім тек спортшының жеке жетістіктеріне ғана емес, сонымен қатар Ресей құрамасының командалық нәтижелеріне, оның ішінде Олимпиада ойындарындағы көрсеткіштеріне де әсер етті.
Енді істің ары қарайғы тағдыры Швейцарияның Федералды сотына байланысты. Оның міндеті – спорттық аспектілерді қайта қарау емес, CAS шешімдерінің заңдылығын тексеру және барлық құқықтық рәсімдердің сақталғанын анықтау. Егер сот процессуалдық бұзушылықтарды анықтаса, іс қайта қарауға жіберілуі мүмкін.
