Ербол Мырзабосынов спорт саласындағы үздіктерді марапаттады

Басқа спорт түрлері Кеше 13:44

Аружан Темірбек

sports24 сарапшы

Астанада ҚР Туризм және спорт министрлігінің ұйымдастыруымен жыл сайын өтетін “Үздік-2024” сыйлығының жеңімпаздарын марапаттау рәсімі өтті. Салтанатты шараға ҚР Парламентінің депутаттары, Олимпиада чемпиондары мен жүлдегерлері, әлем чемпионаттары мен халықаралық жарыстардың жеңімпаздары, сондай-ақ спорт журналистері қатысты.

Туризм және спорт министрі Ербол Мырзабосынов 2024 жылдың қазақстандық спорт үшін ерекше маңызға ие болғанын атап өтті. Оның айтуынша, биыл қазақстандық спортшылар халықаралық жарыстарда жоғары нәтиже көрсетіп, елімізде бірнеше ірі шаралар ұйымдастырылды.

“Биылғы жылдың басты оқиғасы – Париж Олимпиадасы мен Паралимпиадасы. Біздің құрама тарихи жетістіктерге жетті. Дзюдошы Елдос Сметов Олимпиада чемпионы атанды. Бұл – тәуелсіз Қазақстан тарихында дзюдодан алғаш жеңіп алған алтын медаль. Гимнастикадан алғашқы Олимпиада медалін Нариман Құрбанов иеленді. Ал Давид Дегтярев пара-пауэрлифтингтен екі дүркін Паралимпиада чемпионы атанса, Ақмарал Науатбек пара-дзюдодан Олимпиада шыңын бағындырды,” – деді министр.

Сондай-ақ, биыл Астанада 5-ші Дүниежүзілік көшпенділер ойындары ұйымдастырылды. Бұл додаға 89 елдің спортшылары қатысты, ал Қазақстан құрамасы жалпыкомандалық есепте көш бастады.

“Президент Қасым-Жомарт Кемелұлы Тоқаевтың қолдауының арқасында спорт саласында оң өзгерістер басталды. Келесі жылы біздің спортшыларды бірнеше маңызды жарыс күтіп тұр. 2025 жылдың ақпанында Харбинде (Қытай) өтетін қысқы Азия ойындарында спортшыларымыз қысқы Олимпиада лицензиясы үшін бақ сынайды. 2024 жыл тарихқа жақсы нәтижелермен енді, ал жаңа жылдан одан да жоғары жеңістер күтеміз,” – деді Ербол Мырзабосынов.

Жыл үздіктері:

• Елдос Сметов, Давид Дегтярев – “Жылдың үздік спортшысы”
• Ғалымжан Жылгелдиев, Юрий Колесников – “Жылдың үздік жаттықтырушысы”
• Грек-рим, еркін және әйелдер күресі федерациясы – “Жылдың үздік аккредиттелген спорт федерациясы”
• Қуанышбек Есекеев, Қазақстан дзюдо федерациясының президенті – “Жылдың үздік аккредиттелген спорт федерациясының президенті”
• Еркебұлан Ілиясов, “Жамбы ату федерациясы” РҚБ президенті – “Үздік спорт меценаты”
• Kaz Minerals – “Үздік спорт меценаты”
• Ғизат Түсіпаев – “Жылдың үздік ауыл жаттықтырушысы”
• Ерлан Тасболатов – “Ауылдық жердегі үздік дене шынықтыру және спорт әдіскері”
• Дархан Шариғатов – “Ауылдық жердегі үздік дене шынықтыру және спорт нұсқаушысы”
• Мақат аудандық мәдениет, тілдерді дамыту, дене шынықтыру және спорт бөлімі – “Аудандық үздік дене шынықтыру және спорт бөлімі”
• Алматы қаласындағы “Жоғары спорт шеберлігі мектебі” – “Жылдың үздік спорт ұйымы”
• Жамбыл облысы әкімдігінің дене шынықтыру және спорт басқармасы – “Үздік спорттық өңір”
• Илья Мизерных – “Жас және жасөспірімдер құрамындағы үздік спортшы”
• Сергей Сергеев – “Жылдың үздік балалар жаттықтырушысы”
• Надежда Ким – “Дене шынықтыру және спорт саласындағы үздік маман”
• Ақмарал Науатбек – “Спортта үздік серпін”
• Жандос Айтбайұлы (телеканал “Хабар”), Қуаныш Нұрданбекұлы (газета “Егемен Қазақстан”), Назерке Сұлтанбек (сайт “Sport+”) – Сейдахмет Бердіқұлов атындағы сыйлықтың лауреаттары.