Дархан Асаділов Қазақстан каратэ құрамасының жаңа бас бапкері болып тағайындалды

Басқа спорт түрлері 24 сәу 2025 08:41

Аружан Темірбек

Редактор

Қазақстанның каратэ әлемінде үлкен өзгеріс орын алды - Токио-2020 Олимпиадасының қола жүлдегері Дархан Асаділов ұлттық команданың бас бапкері қызметіне ресми түрде тағайындалды.

Асаділов - қазақстандық каратэ тарихындағы ең танымал әрі беделді спортшылардың бірі. Ол спорттық мансабында Токио Олимпиадасында 60 кг салмақ дәрежесінде қола медаль жеңіп алып, әлем чемпионатының күміс (2008) және қола (2018) жүлдегері атанды. Сонымен қатар, Гуанчжоудағы Азия ойындарының чемпионы және Karate 1 Premier League турнирлерінің сегіз дүркін жеңімпазы.

Бас бапкерлік қызметке келгенге дейін Дархан Асаділов жастар құрамасының жаттықтырушысы ретінде табысты еңбек етіп, Шымкенттегі спорт академиясында тәлімгерлікпен айналысты. Енді оның алдында жаңа әрі жауапты міндет тұр - ұлттық құраманы мамыр айының соңында Ташкентте өтетін Азия чемпионатына дайындау. Бұл дода Асаділов үшін бас бапкер ретіндегі алғашқы ірі сынақ болмақ.

Қазақстан құрамасы халықаралық ареналарда тұрақты түрде жоғары нәтиже көрсетіп келеді. 21 сәуірде Каирде аяқталған Karate 1 Premier League турнирінің үшінші кезеңінде қазақстандық спортшылар бір алтын және бір күміс медаль жеңіп алып, командалық есепте үшінші орынды иеленді.