Қазақстандық шорт-трекшілер Әлем чемпионатының жартылай финалына сенімді түрде өтті

Басқа спорт түрлері 02 қара 2024 02:21

Аружан Темірбек

sports24 сарапшы

Қазақстанның шорт-трек құрамасы Монреальда өтіп жатқан Әлем чемпионатының кезеңінде ерлер, әйелдер және аралас эстафеталар бойынша жартылай финалға жолдама алды.

Ерлер командасы (Абзал Ажғалиев, Әділ Ғалиахметов, Глеб Ивченко, Денис Никиша) 5000 метрлік қашықтықтағы үшінші іріктеу жарысында 6 минут 46,556 секунд көрсеткішпен екінші орын алды. Жартылай финалда қазақстандықтар Канада, Оңтүстік Корея және Бельгия құрамаларымен кездеседі. Екінші жартылай финалда Нидерланд, Ұлыбритания, Қытай және Италия командалары сынға түседі.

Әйелдер командасы (Алина Ажғалиева, Яна Хан, Ольга Тихонова, Малика Ермек) 3000 метрлік эстафетаның іріктеу кезеңінде 4 минут 15,325 секунд нәтижемен үшінші орынға ие болып, жартылай финалға өтті. Енді олар жартылай финалда Италия, Оңтүстік Корея және Жапония құрамаларымен кездеседі. Ал екінші жартылай финалда Мажарстан, Канада, Қытай және Польша құрамалары бақ сынайды.

Аралас команда (Яна Хан, Зейнеп Құмарқан, Айбек Насен, Еркебұлан Шамуханов) 2 минут 41,622 секунд нәтижемен іріктеу жарысында екінші орын алды. Жартылай финалда олардың қарсыластары АҚШ, Канада және Нидерланд командалары болады. Екінші жартылай финалда Оңтүстік Корея, Жапония, Қытай және Бельгия құрамалары өнер көрсетеді.