Қазақстан әлемдік спорт жұлдызын қарсы алды: Фрэнк Чамизо беделді турнирде өнер көрсетеді

Басқа спорт түрлері Бүгін 05:00

Аружан Темірбек

sports24 сарапшы

Еркін күрестен Олимпиада жүлдегері, екі дүркін әлем чемпионы және төрт дүркін Еуропа чемпионы атанған әйгілі италиялық балуан Франк Чамизо Астанаға келді.

Қазақстандықтар құрметті қонақты кең дастархан жайып қарсы алып, қазақы шапан кигізді. Франк Чамизо 29 қараша күні Астанада өтетін Wrestling Stars халықаралық турниріне қатысады.

Бұл беделді жарыста Франкпен бірге әлемдік және азиялық күрес жұлдыздары өнер көрсетеді. Олардың қатарында Қырғызстаннан келген Улықбек Жолдошбеков, 23 жасқа дейінгі әлем чемпионы және үш дүркін Азия чемпионы Азамат Дәулетбеков, Азияның екі дүркін чемпионы әрі әлем чемпионатының қола жүлдегері Данияр Қайсанов, Ярыгин турнирінің жеңімпазы және Ресей чемпионы Алан Багаев, 20 жасқа дейінгі әлем чемпионы Исхар Құрбаев, Азия чемпионатының қола жүлдегері Мейрамбек Қартбай, Азия чемпионы Санжар Досжанов, әлем чемпионатының күміс жүлдегері Қорлан Жақанша және жастар арасындағы әлем чемпионы Начин Қуулар бар.

Бұл турнир әлемнің үздік балуандарының басын қосатын ерекше шара болмақ.

Әскерилер арасындағы әлем чемпионатында қазақстандық балуандар 7 медаль жеңіп алды.