Қазақстан халықаралық медальдарға негізделген спорт түрлеріне басымдылық танытады

Басқа спорт түрлері Кеше 23:37

Аружан Темірбек

sports24 сарапшы

Мәжіліс халықаралық жарыстарда жеңіп алынған медальдар негізінде еліміз үшін басым спорт түрлерін анықтауды көздейтін түзетулерді мақұлдады.

Енді Туризм және спорт министрлігі халықаралық аренадағы жетістіктерге сүйене отырып, басым спорт түрлерінің тізімін бекітетін болады.

“Заң жобасы аясында жоғары жетістіктер спортына нақты шектеулер енгізу ұсынылады. Бұл Олимпиада, Паралимпиада, Сурдлимпиада, Азия және Параазиялық ойындар бағдарламасына кіретін, сондай-ақ ұлттық спорт түрлері. Олардың ішінде медальдық нәтижеге қол жеткізген спорт түрлері басымдыққа ие болып, республикалық және жергілікті деңгейде басым тәртіппен қаржыландырылады. Бұл өзгерістер қолданыстағы спорт жүйесін жаңғыртып, оны нақты нәтижеге – “медаль жеңіп алу” бағытына бағдарлауға бағыттайды”, – деп мәлімдеді Туризм және спорт министрі Ербол Мырзабосынов.

Айта кетейік, Қазақстан 2024 жылғы Олимпиада ойындарының медаль есебінде 43-орынды иеленіп, 1 алтын, 3 күміс және 3 қола медаль жеңіп алды. Кейіннен Спорт министрлігі қазақстандық спортшылардың “жақсырақ нәтижеге қол жеткізе алатын мүмкіндігі болғанын” атап өтті. Париждегі Олимпиадада Қазақстан құрамасынан 78 спортшы 25 спорт түрінен өнер көрсетті, олардың 54-і алғаш рет Олимпиадаға қатысты.