Қазақстан астанасында қоян-қолтық ұрыстан Әлем кубогының финалы ашылды

Басқа спорт түрлері Кеше 03:59

Аружан Темірбек

sports24 сарапшы

Астанада Қорғаныс министрінің жүлдесі үшін өтетін әлемдік кубоктың финалының салтанатты ашылуы өтті. Халықаралық жарыс елордадағы Жақсылық Үшкемпіров атындағы жекпе-жек сарайында ұйымдастырылып, оған 15 елден келген 200-ден астам мықты спортшы қатысты. Сайыстарға ерлер де, әйелдер де қатысады.

Турнирдің ашылу рәсіміне Қазақстан Республикасы Қорғаныс министрлігінің басшылығы, еліміздің құрметті қайраткерлері мен спортшылары, қарулы күштердің ардагерлері, халық қаһармандары Тоқтар Әубәкіров пен Бақытжан Ертаев қатысты.

Қазақстан құрамасының сапында халықаралық дәрежедегі спорт шебері, жекпе-жек, панкратион, ММА бойынша шебер, Азия және әлем чемпионаттарының қола және күміс жүлдегері, ХІХ Азия ойындарының қола жүлдегері ефрейтор Аян Тұрсын, ТМД чемпионы лейтенанттар Арман Ерменбет пен Айдын Нұриддинов, сержант Санат Садыков, жекпе-жектен халықаралық турнир жеңімпазы, панкратионнан әлем чемпионатының жүлдегері Абылай Шәкірбеков өнер көрсетеді.

Әйелдер арасында Қазақстан атынан жекпе-жектен әлем және Азия чемпионы, ММА бойынша әлем чемпионы Талшын Жұматаева, панкратионнан Қазақстан чемпионы Зарина Есполова және жекпе-жектен халықаралық ойындардың чемпионы, кәсіби сегізбұрыш лигасының спортшысы Антонина Котляревская шығады.