Сапаров: "ММА – ауыр еңбек, әр жекпе-жекте қарсыласты мерзімінен бұрын жеңу мүмкін емес"

ММА Бүгін 01:14

Аружан Темірбек

sports24 сарапшы

Америкалық Kill Cliff FC жаттығу залының жаттықтырушысы Саид Сапаров, Қазақстанның жартылай орта салмақтағы UFC жұлдызы Шавкат Рахмоновтың дайындығына қатысатын маман, кейбір жанкүйерлердің “Номадтың” алғаш рет мансабында қарсыласын мерзімінен бұрын жеңе алмағанына қатысты реакциясын қатаң сынға алды.

“Шавкат октагоннан шыққанда, айналасында біртүрлі үнсіздік орнады, барлығы оны жеңілгендей қабылдады. Бұл үлкен әділетсіздік. Жанкүйерлердің көзқарасы өзгеруі керек деп санаймын. ММА – ауыр еңбек, әр жекпе-жекте қарсыласты мерзімінен бұрын жеңу мүмкін емес. Иә, фиништер статистикаға әдемі көрініс береді, бірақ бұл ең бастысы емес. Тәжірибе жинаған сайын және уақыт өте келе, шешіммен жеңіске жету де спортшының шеберлігін көрсететін маңызды фактор екенін түсінесің. Мұндай жеңістер боксшының деңгейін төмендетпейді, керісінше, оның шыдамдылығы мен кәсібилігін айқындайды. Біз әрбір нәтижеге сабырмен қараймыз. Альхамдулиллах, бастысы – жеңіс,” – деді Сапаров “Спорт Шрёдингера” арнасына берген сұқбатында.

Айта кетейік, 8 желтоқсанда UFC 310 турнирінің басты оқиғаларының бірі саналатын жекпе-жекте Шавкат Рахмонов бес раунд бойы қарсыласы Иэн Гэрриден басым түсіп, төрешілердің бірауыздан қабылдаған шешімімен жеңіске жетті.