18 жасқа дейінгі Қазақстан құрамасы әлем чемпионатында Аустрияны жеңді

Хоккей 24 сәу 2025 13:17

Аружан Темірбек

Редактор

Қазақстанның жасөспірімдер хоккей құрамасы (U18) Мажарстанның Секешфехервар қаласында өтіп жатқан әлем чемпионатының IA дивизионы аясында Аустрия құрамасын сенімді жеңіске ұшыратты. Қазақстандықтар қарсыластарын 4:2 есебімен тізе бүктірді.

Бірінші кезеңде-ақ біздің команда айқын басымдыққа қол жеткізді. 5-минутта Магыш көпшілік сәтті пайдаланып, есеп ашты. Одан кейін Киреев пен Түсіпбеков есепті 3:0-ге жеткізіп, сенімді артықшылық орнатты. Аустриялықтар екі шайбамен жауап қайтарды, алайда матчтың соңғы нүктесін кездесудің аяқталуына бір жарым минут қалғанда Ибрагим қойды. Ол қазақстандықтардың төртінші шайбасын соқты.

Аустрия — Қазақстан 2:4 (0:3, 1:0, 1:1)
Шайбалар: 0:1 — Магыш (Ибрагим, Сәркенов), 5:22 (Көпшілік); 0:2 — Киреев (Медведев, Евплов), 13:24; 0:3 — Түсіпбеков (Бақыт, Міндубаев), 14:40 (Көпшілік); 1:3 — Коларик (Оберхаузер, Хутцингер), 35:53; 2:3 — Оберхаузер (Коларик), 49:21; 2:4 — Ибрагим, 58:53 (Бос қақпа)

Қақпашылар: Хайтцманн — Лыткин

Төрт матчтан кейін Қазақстан жеті ұпай жинап, турнирлік кестеде үшінші орында тұр. Құрама көшбасшы Украинадан екі ұпайға қалып келеді. Алайда бұған дейін Даниядан 2:5 есебімен жеңіліп қалғандықтан, қазақстандықтар бірінші орын үшін және элиталық дивизионға шығу мүмкіндігінен айырылды.

Қазақстан құрамасы келесі кездесуін 26 сәуір күні Украинаға қарсы өткізеді.