Хэмилтонның Феррари сапындағы алғашқы жеңісі – Қытайдағы спринттегі триумф
Льюис Хэмилтон "Феррари" сапында алғаш рет жеңіске жетіп, Қытай Гран-приіндегі спринт жарысында топ жарды. Ол поул-позициядан басталып, 19 айналым бойы көш бастады. Бұл тек оның жаңа командадағы алғашқы жетістігі ғана емес, сондай-ақ Формула-1-дегі спринт форматындағы алғашқы жеңісі болды.
Хэмилтон 10 айналым бойы Макс Ферстаппенге қарсылық көрсетіп, кейін "Ред Булл" жүргізушісі жылдамдығын жоғалта бастады. Осы сәтті пайдаланған Оскар Пиастри оны басып озып, екінші орынға шықты, бірақ Хэмилтонды қуып жете алмады.
Бұл жеңіс маусымды сәтсіз бастаған "Феррари" үшін чемпиондыққа таласуға жаңа үміт сыйлады. Хэмилтон 8 ұпай еншілеп, негізгі жарыста да жеңіс үшін күресуге ниетті.
Джордж Расселл төртінші орынға көтеріліп, Шарль Леклерді артта қалдырды. Ал "Рейсинг Буллс" өкілі Юки Цунода керемет нәтиже көрсетіп, алтыншы орынмен мәреге жетті.
