Формула-1 басшылығы пит-лейндағы жылдамдық шектеуін арттыруды жоспарлап отыр

Формула-1 27 сәу 2025 15:25

Аружан Темірбек

Редактор

Формула-1 мен Халықаралық автоспорт федерациясы (FIA) пит-лейндағы жылдамдық шектеуін қайта қарастыруды талқылауда. Бұл туралы The Race басылымы хабарлады. Жобаға сәйкес, қазіргі 80 км/сағ лимитін 100 км/сағ-қа дейін көтеру ұсынылып отыр. Мұндай өзгеріс жарыстарды қарқынды етіп, пит-стоптар санын көбейтуге ықпал етуі мүмкін.

Мұндай бастамаларға 2025 жылғы алғашқы кезеңдер себеп болды. Маусымның алғашқы Гран-при жарыстары стратегиялық әртүрліліктің төмендігімен және пит-стоптардың аздығымен ұйымдастырушылардың алаңдаушылығын тудырды. Көптеген командалар бір ғана тоқтау тактикасын таңдады, бұл жарыстың драматургиясын төмендетті.

Стратегтерге көбірек таңдау еркіндігін беру және бәсекелестікті арттыру үшін шиналарды жеткізуші Pirelli алдағы кезеңдерде шиналар құрамын қайта қарап, командаларға таңдау жасауды күрделендіруді жоспарлап отыр. Дегенмен, бұл жеткіліксіз болуы мүмкін. Сондықтан пилоттардың бокстарға кіріп-шығу уақыты қысқаруы үшін пит-лейндағы рұқсат етілген жылдамдықты арттыру ұсынылуда.

Бұған дейін, «Red Bull» командасының көшбасшысы Макс Ферстаппен маусым оңай болмай жатқанын және команда бірқатар техникалық мәселелерге тап болғанын атап өткен болатын.