Өзін жарақаттау және сарказм: Пеп Гвардиола дағдарысты еңсере алмауда

Футбол Бүгін 07:29

Аружан Темірбек

sports24 сарапшы

“Манчестер Ситидің” бас бапкері Пеп Гвардиола өз мансабындағы ең ауыр кезеңдердің біріне тап болды. Команда бір ай бойы жеңіске жете алмады. Бес қатарынан жеңіліс пен “Фейеноордпен” (3:3) тең ойыннан кейін каталондық бапкер үлкен сынға ілінді.

“Фейеноордпен” өткен ойыннан кейін Гвардиола баспасөз мәслихатына бетінде тыртықтармен келді. Журналистер мұны бірден байқады, ал Пеп бұл жарақаттарды өзіне әдейі жасағанын мойындады. Ол бұл әрекетін эмоционалдық ауыртпалықтан арылу үшін физикалық ауырсынуды сезінгісі келгенімен түсіндірді.

Вербалды емес коммуникацияның маманы Даррен Стэнтон Гвардиоланың мінез-құлқын талдап шықты:

“Оның қимыл-қозғалыстары үлкен күйзеліс пен бақылаудың жоғалғанын көрсетеді. Басынан жиі ұстап, иығын көтеріп, ауызын қолымен жабуы – эмоцияларын жасыру әрекеті. Оның күлкісі жасанды көрінеді, ал өткенге назар аударып, шешім іздемеуі – оның абдырап қалғанын білдіреді. Ол бұл дағдарыстан қалай шығарын білмей жүрген секілді.”

Сонымен қатар, маман тыртықтар туралы сұрақтарға берген жауаптарына ерекше назар аударды:

“Сарказм – оның қорғаныс механизмі. Ал өзін жарақаттау – ішкі жан айқайының белгісі. Пеп өз әдістерінің дұрыстығына сенімді, бірақ нәтиженің болмауы оның өз-өзіне деген сенімін шайқап жатыр.”

Клубтағы жағдай жанкүйерлер мен сарапшылардың алаңдаушылығын туғызуда. Мәселе тек нәтижелерде ғана емес, бас бапкердің эмоционалдық жағдайында. Егер Пеп өз ішкі күйзелісін еңсере алмаса, бұл “Манчестер Ситидің” мәселелерін одан әрі тереңдетуі мүмкін.

Сарапшылар қазір Гвардиоланың команда формасын ғана емес, өз психологиялық тепе-теңдігін де қалпына келтіруі маңызды екенін атап өтуде.