Лукас Васкес «Реал Мадридтен» кетеді: 15 жылдық тарих аяқталуға жақын
Мадридтік «Реалдың» қорғаушысы Лукас Васкес 2025 жылғы маусымда клубтан кетеді. Бұл туралы танымал инсайдер Фабрицио Романо хабарлады. Оның айтуынша, футболшы мен клуб келісімшартты ұзарту жөнінде ортақ шешімге келе алмаған. Қазіргі келісімшарт маусым айында аяқталады, ал Васкес үшін «Реалдағы» соңғы турнир - осы жазда өтетін Клубтар арасындағы әлем чемпионаты болмақ. Осылайша, 32 жастағы ойыншы командамен қоштасып, 15 жылға жуыққа созылған сапарын тәмамдайды.
Лукас Васкес «Реал» академиясына 2007 жылы қабылданып, кәсіби мансабын толығымен дерлік мадридтік ұжымда өткізді. Тек 2014/15 жылғы маусымды ғана ол «Эспаньол» клубында жалда өткізген болатын. Ал қалған жылдары «корольдік клуб» сапында өнер көрсетіп, бес мәрте Чемпиондар лигасын, төрт рет Ла Лига чемпиондығын және басқа да көптеген жүлделерді жеңіп алды. Ол ұзақ жылдар бойы оң қапталдағы маңызды ойыншылардың бірі саналып келді.
Романоның мәліметінше, тараптар келісімшартты тағы бір маусымға ұзарту мәселесінде мәмілеге келе алмаған. Сондықтан бұл шешім екі жақтың да келісімімен қабылданды. Қазіргі таңда Васкес өзінің болашағы жайлы нақты шешім қабылдаған жоқ, алайда ол Еуропа клубтарынан да, басқа құрлықтардан да келіп түскен ұсыныстарды қарастыруға дайын.
Бұл уақытта «Реал» жаңа маусымға қызу дайындалып жатыр. Клуб 2025/26 жылғы маусым қарсаңында Бразилия құрамасымен жолдастық кездесу өткізуді жоспарлап отыр.
Байланысты командалар мен лигалар
