Лионель МЕССИ: "Енді мен Аргентинаға жай фанат ретінде қолдау көрсетемін"

Футбол 17 нау 2025 23:28

ФОТО: gettyimages.com

"Интер Майами" мен Аргентина құрамасының 37 жастағы ойыншысы Лионель Месси жарақатына байланысты пікір білдірді. Бұған дейін оның осы себепті наурыз айында өтетін ұлттық құрама матчтарын жіберіп алатыны және 2026 жылғы әлем чемпионатының іріктеу кезеңіне шақырылған ойыншылар тізіміне енбегені белгілі болған.

"Ұлттық құрамамен бірге Уругвай мен Бразилияға қарсы өте маңызды екі ойында алаңға шыға алмайтыным өкінішті. Әдеттегідей, командаммен бірге болғым келді, бірақ соңғы сәтте айтарлықтай ауыр емес жарақат алдым. Бұл мені біраз уақытқа ойыннан шеттетуге мәжбүр етті. Осы жерден жанкүйер ретінде қолдау білдіріп, құрамамен бірге боламын.
Алға, Аргентина!" – деп жазды Месси Instagram-дағы сторисінде.

Қазіргі маусымда Месси 5 матчқа қатысып, 4 гол соғып, 2 нәтижелі пас берді. Transfermarkt мәліметі бойынша оның нарықтық құны 20 миллион еуроға бағаланады, ал Майами клубымен келісімшарты 2025 жылға дейін жасалған.