Левандовский Чемпиондар лигасында 100-ші голын салды

Футбол Кеше 15:28

Нұрбақыт Қадырбаев

sports24 сарапшы

“Барселонаның” шабуылшысы Роберт Левандовский Чемпиондар лигасындағы 100-ші голын соқты.

Бүгін “Брестке” қарсы матчта Польшаның шабуылшысы кездесудің 10-шы минутында пенальтиді голға айналдыру арқылы бұл мерейтойлық көрсеткішке жетті. Ол Криштиану Роналду мен Лионель Мессиден кейін Чемпиондар лигасында үш таңбалы гол соққан үшінші ойыншы атанды.

Роберт бұл нәтижеге қол жеткізген кездесулер саны бойынша да екінші болды. Оған 125 матч қажет болды. Месси 123 матчпен жарыста көш бастап тұр, ал Роналду 143 матчта 100 гол соққан.

Левандовский осы маусымда өзінің екінші жастық шағын өткізіп жатыр, ол осы маусымда барлық жарыстарда 19 матчта 21 гол салып, 2 нәтижелі пас берді.